【阿碌开咪】换新钞遇怪鸡逻辑

过去三十多年，一直是「狮子银行」的「尊贵客户」，的确方便，排队也快捷点，到大型分行更有咖啡及报章、杂志享受。

年尾客户主任非常有礼来电：「曾先生，要换新钞封利是吗？我哋可以预早安排！」

「好呀！唔该晒，要三千蚊一百、三千蚊五十、四千蚊二十啦！」「得，你二月一日上来换啦。为免太多人，建议你早一点，唔使等，唔使逼！」

周一早上，准时九点，银行一开就即进入，果然迟十分钟就真系烦过「何非凡」，大量客人已杀到！客户主任招呼入房，电脑上揿揿我户口，话：「曾先生，你未填最新风险评估喎，填埋先啦！」小弟呢类「老江湖」，一听就知此乃银行套料，然后再推销「金融产品」伎俩啦。「X小姐，咁啦，唔好阻你时间，不如我返屋企，再上网慢慢填啦，唔好烦你喇。」

「唔烦唔烦，有同事帮你，快好多！」此时即有位靓仔步入，礼貌周周协助我填个人的风险评估，结论系——保守（即他日唔使Sell你甚么「高风险高回报」产品矣）。搞一大轮，才可坐埋柜位换新钞。「小姐，呢度一万蚊现钞，唔该！」

「曾先生，唔得喎，你一定要先由户口提取现金，才可换新钞㗎！」

「我正是刚刚由楼下提款机，于同一户口提一万蚊畀你，点解唔可以用佢来换呢？」我觉得冇乜逻辑，于是据理力争。

「……」柜枱职员有少少为难：「唔好意思呀，呢个系公司政策，麻烦你，先签字提款啦！」

各位，我揸住一万元现金换新钞，竟然唔接受，硬要再在同一户口提款才可换。请问有冇「银行家」读者可解释呢个究竟系乜逻辑呢？烦成咁。小弟当然费事拗，即签名再提一万元现金。兑换的一万元新钞，立即到手。

「曾先生，仲有乜可以帮到你呢？」

「有，请将我原本拿来换新钞的一万元，存回同一户口！」

柜员照做。我离开银行，仍无法搞清究竟「狮子银行」搞呢个扰客政策，有乜动机？

曾智华

阿碌开咪