阿碌开咪｜阿叔大忌：激瘦

 

周二早上打开报章国际版，见到一个阿伯，好熟口面，旁边又站着另一个阿伯，唔识。

哈，编辑点解将呢两位阿伯大头相霸占主要版位呢？究竟系「乜水」咁巴闭呢？

右边一位，叫余茂春。啊啊，记得嘞，是上届美国政府决策层的「中国问题军师」。咁左边一位系……睇到名字嘞……咦喂，唔系「化」，乜个款变咗咁？原来阿伯正是落任一年、只得五十八岁的美国前国务卿蓬佩奥！

点解小弟形容佢「搞成咁」？因昔日霸气十足的「老蓬」，短短一年啫，瘦咗几个码，老晒。

可能昔日佢个款够猛够劲，原因多少来自胀卜卜的大件头，充满威势及压场感，真系唔知打唔打得都肯定吓得。代表美国四出与各国周旋，未开口都已经住对手。

但如今？乜势乜款都冇晒（单睇相）。最弊以前胀卜卜的皮肤，一激瘦立即变皱，尤其条颈，似十足漏气气球咁款。相比以前个巴闭型格，真是有点唔多顺眼。

其实男人上咗年纪，太肥当然唔好。不过，肥开的人突然用药物或疯狂节食搞到快速急瘦，对身体对精神对外观，皆非好事。眼前的蓬佩奥，就是最佳例子。

小弟同年纪朋友，相聚时，若对方突然激瘦，一定不会属好事，真系绝不恭喜。

最多的是癌魔突袭，正常细胞及脂肪被癌细胞吞噬。一位早前去世老友，正是如此，可以在半个月内急瘦近二十磅。

另一种，是刚刚验出有糖尿病或三高，立时吓到腾腾震。由昔日大吃大喝到突然冇油冇糖冇盐再加药物。又系，咁搞法，当然「殊」声唔见二十几三十磅。呢类老友，见到佢哋日夜担心，再冇晒叹美食美酒兴趣，走入一个不快乐的极端，怎可能健康？而最弊，人又落晒形，点睇都不是好事，反多后来因欠缺均衡营养而百病丛生。

我认为最佳方法，药物及食量控制当然必须，但运动也极重要，维持有一定脂肪及肌肉，如此才会更健康及有返个型格！

曾智华

阿碌开咪