【头条独家】买嘢食不忘买嘢𠱁爱女　谢天华原来系「女儿奴」

「囡囡系爸爸的前世情人」果然是至理名言，现年52岁的谢天华去年再做老窦，其妻李天恩（Tina）为他诞下细女Mia，天华随即变成「女儿奴」，连大仔谢浩飞（天天）都要行埋一边！日前，天华揸电单车落大坑买嘢食，经过文具店都不忘拣件礼物送畀小朋友，不过见天华睇来睇去都是Hello Kitty同My Melody，似乎偏心咗啲喎！采访：张咏森

谢天华于05年迎娶拍拖12年的圈外女友李天恩，努力咗足足10年才诞下儿子谢浩飞。圆梦做老窦的天华锡仔锡到燶，不单止经常黐住个仔、陪佢玩，更不时于社交网纪录囝囝的成长。去年两公婆再度宣布喜讯，Tina以45岁高龄怀第二胎，仲凑够一个「好」字！而幼女Mia出世冇耐，天华已冧滋滋指望住B女「唔食饭都饱」，今年9月底帮囡囡开1岁生日P时，这位「宠女狂」全程揽实Mia，父爱泛滥，搞到大仔都呷晒醋！

素菜馆熟客仔
而升呢人父后，从前喜爱夜蒲的天华亦修心养性，转蒲超市、玩具及文具店，好似日前下午1点于大坑食完Lunch后，天华就揸架绵羊仔去一间素菜馆买嘢食，甫泊低车，脱下头盔、面都红晒的天华，见个型仔头塌鬼晒，即刻戴番顶Cap帽遮吓丑。行到斋铺，啲员工一见到他便笑晒口，似乎天华都系熟客仔，之后买了一袋豆沙包，就快步行去附近的超市扫多几个橙。返去攞车时，经过一间文具店，天华见到一堆好粉红的Hello Kitty、My Melody精品，又自自然然上前睇吓、模吓，未知是否想买嘢返去𠱁囡囡呢？最后，他买完一件礼物仔便驾车回家了。