【维港会】质疑唔靠父母亦可上车 网民批年轻人好高骛远唔肯捱苦

香港楼价长年高企难以负担，有网民发文，指「唔靠父母好难上车 ?想问有楼网友系唔系靠父母上车 ?」。结果引来网民激烈争议，批斗年轻人不切实际。

有网民称，「我冇靠父母呀，不过我觉得如果肯住远啲住细啲，无话上唔到车架，我识啲后生个个要住新楼，咁无计架喎…咁高要求，你话唔靠父母点上车…我父母就系捱生捱死先有层楼嗰种。不过依家啲人唔会明，只会话食少餐日本菜去少次旅行亦唔代表会买到楼」

其他网民顺势指责年轻人好高骛远，「仲要交通方便，住屯门话屯门公路塞车返唔到工，住元朗又嫌要搭港铁乜乜乜」、「都唔好话大西北﹐就算市区楼﹐只要唔系MTR上盖附近嘅就唔考虑。(要转车先到MTR嘅更加唔会谂)。所以有时啲人话啲楼价系咁升﹐佢储极都唔够楼价升得快﹐其实有时真系只要退一步就可以上到车。」、「唔好咁多要求，又要巿区，又要新楼，又话要有会所，仲唔可以细，点会搵唔到， 3百多万嘅楼一定有」

其他网民认为客观条件已经比早年困难，不应同日而语，「无靠父母 上车N年前同宜家比 好难比，以前搵几千，买几十万楼，畀一成就上咗。」、「又咁讲，2018年前买楼的，唔好自high 讲到自己好本事。几年变化，天同地！」、「系好难，首先你要揾倒另一半系有心同你成家立室的，然后要两个人都月入起码三万以上，再者要两个都锺意储钱，咁先有机会完全靠自己上车而层楼又不至太差location果只」。