【独家】李丞责博士早预言家有喜事 家燕姐首做嫲嫲兴奋到瞓唔到

牛年刚开始，被堪舆学家李丞责博士预言今年继续旺的薛家燕终于「升呢」做嫲嫲，讲明男女孙都冇所谓的家燕嫲嫲雀跃地说：「收到新抱第一手喜讯后，我紧张到成晚瞓唔到，朝早八点弹起身周围打畀朋友，问有乜补身汤水推介。」因为太紧张讲到吞吞吐吐，家燕嫲嫲竟然话，「我谂佢哋会怀疑我有喜呀！哈哈哈哈…」仲话会叫新抱得闲听吓《皆大欢喜》，「一出嚟个BB就识跳十字步。」准嫲嫲愈讲愈笑，愈笑愈大声，恭喜晒家燕嫲嫲。采访：方骞平 摄影：张咏森

最近薛家燕、林盛斌及黎诺懿等主持TVB新春节目《天天开运王》，乘机拉住李丞责博士预测牛年运程，李博士预言家燕姐今年能保持良好状态，仲可能家有喜事！当时仍然要守住秘密嘅家燕姐只能大笑回应：「承你贵言！」

开心过自己有咗

年初三即情人节当日喜讯通天，家燕姐不断收到祝贺短讯，「嗰日我回短讯都回唔切，真开心！好记得收到第一手消息嘅时候，当晚新抱仔整咗个蛋糕，上面有张BB超声波相，但当时我冇为意，又冇睇清楚，以为佢整蛋糕畀大家食，经解说后，我开心到唔识讲任何嘢，比起自己当年有咗更雀跃。」因为太开心，家燕姐表示当晚瞓得好少，「朝早八点钟就醒咗，一醒咗就谂起新抱有咗，好兴奋咁起身睇吓有乜要做，唔想再瞓返，跟住好忙咁逐个打畀朋友了解煲乜汤可以补身？但又唔敢话畀朋友听新抱有喜。朋友都意识到有唔妥，好奇追问：『乜你咁补呀？』我话系呀！系呀！总之我要补身啦！最后我拣咗煲灵芝花胶汤，我谂佢哋会怀疑我有咗呀！」语毕，家燕姐笑得更大声。

避谈送礼赠新抱

家燕姐尊重儿媳安排，有关改名、家庭计划、凑孙等问题唔使她操心：「始终新一代做法唔同，佢哋有打算，最紧要新抱安吓胎先，得闲听吓《皆大欢喜》，等佢开心啲，一出嚟个BB就识跳十字步，胎教好紧要㗎！出世之后就要听《弟子规》，等佢学识有规有矩，𠵱家我要upgrade改名叫『家燕嫲嫲』哈哈哈，不过，都系叫返『家燕妈妈』好听啲！」被问到送乜名贵礼物奖励新抱时，家燕姐即避谈：「应该佢哋奖励我就真，因为知道我好想做嫲嫲，(日后会唔会减少工作凑孙？)交畀经理人囡囡珊珊安排。」

Bob系百子千孙格

另外，李博士指阿Bob好健壮，加上系百子千孙格，好有福气，好有机会再做爸爸！阿Bob即耍手拧头话老婆经已宣布封肚，叫他喺出面搵女人生，惟有集中火力搵钱先：「我反而最想4子女返到学，见佢哋日日喺屋企对住平板电脑学习，唔系正常社交活动，又怕佢哋近视加深，又唔知咁样授课，佢哋入唔入到脑。」而黎诺懿最想添个牛女，李博士教他喺屋企东北位摆果籽及柑桔等，平日就放柠檬，有助催旺人丁，如催财就喺西位放流水摆设、水晶、水种植物及养鱼。