【独家】开网店卖自家品牌服装 王梓轩创作剧本立志做监制

受疫情影响打乱咗工作及生活，因为多咗时间令王梓轩有更多学习机会，由艺人变身时装网店老板，他更度好咗几个剧本，立志做埋戏剧监制，打算跨国界合作拍戏再喺合适平台出售。有危自有机，喺经理人石佑珊(薛家燕大女)支持下，34岁王梓轩为事业冲冲冲！采访：方骞平 场地：My Fitness 服装：D-mop

王梓轩投资6位数字开设自家时装品牌网店，背后原来有段「故」：「去年初去美国casting，点知疫情一发不可收拾，被迫滞留喺洛杉矶8个月，除咗修读短期演技课程外，仲同当地年轻人创作咗5个，唔同形式、唔同地方、唔同规模嘅剧本，立志做埋监制，不过仲有实际资金问题有待考量。原来做监制唔容易，由创作故事到埋班，甚至放喺边个平台播出，乜都要一脚踢，今次真系学到嘢。」

疫情下搵赚钱机会
另外，疫情下少咗人出街，网购意欲增加，王梓轩同珊珊又着手搞网店：「我构思嘅卡通公仔Shitto Kun（酸葡萄）好搞嘢，成日玩自嘲，好唔抵得人，有唔少『贱嘴语录』！如喺冷帽度写上『same shit to different day』(日日都系咁衰㗎啦)，其实都系想表达喺疫境下，大家嘅酸溜溜情绪，只想大家得啖笑嚟释怀。」除创作咗一系列卫衣、冷帽及和潮牌crossover背囊外，梓轩还鼓励跟fans互动，邀请佢哋做设计师设计短袜，由才华变成实体产品，又可出售获利。