【独家】徒步18日京都到东京有所感悟 吴业坤遇困难坚持就有曙光

吴业坤(坤哥)趁住30岁于超龄前赶「尾班车」，去年11月中到日本Working Holiday，2月28日就启动「东海道53次」，由京都徒步到东京，最后坤哥多出原定时间两日，共用咗18日完成全程约492公里旅程。坤哥话今次行程有苦有乐，总之饱历风吹雨打令他顿悟人生真谛：「人生道路几咁困难都要一个人去坚持，只要捱得住，曙光会再现！」采访：方骞平

吴业坤头两个月喺日本抱住「佛系」心态，冇积极搵工，日日瞓到自然醒就去医肚，悠悠闲闲体验当地人生活，学吓日文会话等，唔使媾日本妹，日文都进步神速，普通对话绝对唔系问题。后期他发觉，原来工作假期乜都冇做过，最终决定挑战自己，启动「东海道53次」。

沿途欣赏风光感受文化

「东海道53次」唔容易捱，虽然坤哥只系孭住简单行装，但不论晴天雨天，日头及夜晚，每日要行30至40公里都系一个负担：「第一日对脚痛到不得了，但拐住都要行，结果较预计时间迟咗两个小时，直到夜晚11点先去到酒店，到第二日仲要夜晚拐住行山路，每行半个钟就要休息吓，直至去到第5日身体先开始习惯，打后都能够如期抵达酒店。原来唔行唔知身体差，唔到自己认叻。不过，沿途风景明媚，亦感受到唔同嘅文化，好似西南面静冈啲人比较好客，东京人有都市冷漠。」

因为体力有限，每日极限行30公里，所以一定唔可以行错路，就算有次漏咗件风褛都唔可以返转头拎，最怕误时因为夜晚好冻，摸黑条路更难行，体力及意志都会更薄弱：「呢个旅程好似人生缩影咁，人生道路上唔可以返转头，只要喺困难中坚持落去就会有曙光，正如有日我行到好攰，抬头一望竟然见到好靓嘅富士山，嗰刻真系好感动。」