【私追风波】列4点禁粉丝与MIRROR互动　花姐撰千字文向梁祖尧道歉

MIRROR日前在梅窝拍摄新节目《调教你MIRROR》，未料却有超过200名「镜粉」（MIRROR粉丝称号）闻风而至，希望「野生捕获」偶像。无奈因严重阻碍外景拍摄，即使工作人员及12位成员先后劝喻离去仍不果，导致拍摄项目要取消。连日来不少粉丝批评经理人花姐（黄慧君）摆MIRROR上枱，更令姜涛惨变「磨心」，而传教MIRROR劝走私追粉丝的梁祖尧也受牵连，被轰为节目效果拍摄粉丝被闹过程。

继日前姜涛在Telegram发长文向「姜糖」（姜涛粉丝称号）道歉后，昨晚花姐也就事件在IG贴出千字文，解释开拍该节目的初衷：「因为《全民造星III》，我认识左（咗）祖尧老师，佢除左（咗）教导参赛者表演嘅技巧，仲可以令佢地（哋）更了解自己，勇敢面对自己嘅问题而得以改善，而且佢真心爱佢身边嘅人，所以我地（哋）都叫佢做妈妈。后来，公司准备为MIRROR开一个综艺节目，我不（忽）发奇想，如果开一个调教MIRROR嘅节目应该会几好睇，大家可以更了解MIRROR，而且可以pass一个『面对自己棱角』嘅Message俾（畀）观众，重点系MIRROR亦可以透过呢个节目变成更好嘅人、更好嘅表演者。祖尧老师听到呢个idea一口答应，不过佢话如果节目要达到我嘅效果，MIRROR要放低平时嘅偶像包袱，唔可以有其他人骚扰，同埋我唔可以在场。于是制作组一直将拍摄地点保密，连我都唔知。」

花姐又向节目主持梁祖尧道歉，她续道：「不过香港唔系好大，系（喺）拍摄嘅第一日已经有fans知道地点，仲系同一个营地book左（咗）房。拍摄第二日，大约有60个fans贴身跟著（着）MIRROR，制作组劝喻fans离开，到傍晚MIRROR同祖尧去到一间酒吧，fans聚集在门外，因为太多人，于是旁边嘅店铺顾客同行人投诉，制作组无奈要将两个拍摄item cancel。MIRROR 12子于是提出亲身劝喻fans离开，祖尧打电话问我，我当时认为fans应该会听MIRROR说话，所以批准佢地（哋）咁样做，制作组亦答应唔会将fans嘅样剪出街，只系想影MIRROR点样自己面对同解决问题。呢两日我收到好多dm，亦见到大家嘅留言，于是我决定出呢个post，我明白大家好爱MIRROR，但同时唔希望有人唔了解事件而针对帮紧MIRROR嘅人，我希望系（喺）度同祖尧老师，制作团队道歉。」

之后，花姐列出以下4大不适当情况下会阻止粉丝与MIRROR成员互动：
1. 如果MIRROR成员因停低影相而令环境混乱，阻塞通道导致其他人不便，或喺唔适合嘅地方例如马路，我都唔希望MIRROR成员停低同fans互动
2. MIRROR成员工作时，如果fans会影响到，我都会劝喻离开或保持较远距离
3. 如果当时MIRROR成员嘅状态不适合影相，我都会代佢地拒绝影相
4. 当fans影响到MIRROR成员嘅私人时间或私隐，都会被拒绝

最后，花姐强调两年来接触的大部份「镜粉」都好乖、好体谅，也多谢一直爱锡MIRROR的粉丝，希望他们可以继续陪MIRROR成长，又寄语12位成员把握今次学习机会，不要浪费祖尧老师及制作团队的心血。