【独家】林盛斌出钱搞个唱变恶梦 刘威煌获网友支持再踏舞台

第一届《超级巨声》出身嘅刘威煌将于4月30日喺麦花臣场馆举行一场演唱会，他原已放下歌唱事业全力经营珍珠奶茶生意，估唔到疫情下竟造就他「Rebirth」(复活)！。采访：方骞平 摄影：梁志明 化妆：Sandy Kwok @B.Glamorous 发型：Franco Chung @Leonardo 3 Hair corner 场地：Fine Restaurant & Lounge

6年前，刘威煌喺老板林盛斌支持下开咗处男个唱《My Time音乐会》圆梦，岂料变成一场恶梦：「当年喺全港最细嘅场演出，叫咗唔少朋友去撑场，但结果输晒，票房惨淡只系坐得半场，外界完全唔知我开过个唱！之后我冇晒信心，好惊，老板咁支持我都好感恩，不过真系好歉意，感觉好对唔住老板。」

歌手朋友撑场请买飞
虽然威煌强调唔系打击，但亦有感受：「冇话系打击，只系反映咗我唔适合呢个市场，发完呢场梦咪醒晒，谂通咗锺意唱歌唔一定要做歌星，可以唱K唱饱佢！岂料喺疫情下开Live唱吓倾吓，竟然累积到几百个网友追踪，佢哋反而好想睇到实体show。今次开show冇公司back up，亦零赞助商，条数要计得好准，只要有5成观众就唔使蚀，𠵱家放宽7成半入座率，希望加添到进帐，所以亦不设免费贵宾席，圈中人有心支持就购票入场，唔使拍膊头周围搵人撑。」刘威煌强调曾有不快经历，𠵱家心态唔同咗：「其实大有大做，细有细做，我唔想再畀任何人压力，包括自己，我非常渺少，我只系锺意唱歌，有班人会听我嘅歌，就系咁简单，暂时冇谂到太长远，只系唔会抗拒幕前演出。」