【独家】任主持顺便攞料做婆婆余安安将停工专心迎接乖孙

2021-05-02 21:00

余安安最近首度为TVB新节目《日日妈妈声》出任主持，拍住罗敏庄和陈凯琳齐齐同圈中妈妈分享心得，虽然跟两位拍档初次合作，但安安姐觉得大家出奇地有默契，合作得非常愉快。提到下月将第一次荣升婆婆，安安姐既兴奋又担心，所以录影完该节目后，会专心迎接乖孙出世才接新工作。撰文：杜淑霞摄影：谭壹致发型：Lab two salon@yan kwok 化妆：谚曈·小白服装：MARINA RINALDI

安安姐收到曾志伟和王祖蓝邀请后，认为节目很适合自己做，所以接受挑战，「个节目元素真系几啱我做，所以佢哋一搵我系几锺意，我又未做过主持𠻹，挑战吓几得意，又唔算有太大压力，始终自己做咗咁多年妈妈，喺做妈妈嘅所有过程，同埋凑细路仔都算叫做有经验啦，都可以有好多嘢可以分享。」

至于跟罗敏庄及陈凯琳合作，安安姐一样有赞冇弹，「我哋当然认识，但唔系太熟，但又冇专登去夹过，第一日拍嘅时候出奇地默契几好，唔知点解个frequency、个默契几好，所以件事出嚟几舒服，同埋大家唔同位置讲嘢，因为大家年纪唔同，share嘅嘢都唔同。反而我会听番佢哋最新一辈嘅资讯，可以返去同我个女倾吓，攞定料畀个女。」

谈到即将做婆婆，安安姐自言心情既兴奋又担心，「个女决定咗生BB，跟住睇到佢真系佗BB，我自己好感动，可能我同啲女感情好深厚，非常之锡佢哋，自己经历过做妈妈，肯做妈妈系件好伟大嘅事，我同佢讲嘅时候都眼湿湿，『因为真系唔容易㗎！你肯去负起呢个责任，两夫妻都唔简单，因为将来面对生活有好多嘢系好唔一样，你真系咁锺意细蚊仔，你又知道将来面对所有嘢，都肯去做呢样嘢，我觉得好伟大罗！』佢哋未佗嘅时候，决定话要做爸爸妈妈，我都将所有好同唔好嘅嘢，讲晒畀佢哋听，畀佢哋知道要面对啲咩，佢哋知道晒，系好担心，当然亦都好兴奋，担心始终身体上有好多变化，其实生BB都危险，始终自然生危险性高啲，所以都好担心佢。」安安姐已决定暂时停工专心凑孙，「虽然佢都有个陪月，但都系睇住吓，就算唔系睇住个BB，都帮手睇吓个女。」