【独家】家人打晒疫苗放心行开乔宝宝又返咗香港搵钱

2021-05-04 19:54

印度裔香港人乔宝宝上月23日三代同堂，好开心咁庆祝51岁生日。原来喺苏格兰小住咗大半年嘅宝宝又「身痕」，日前悄悄返港，待完成21日隔离期就开工。宝宝说：「我全家都打咗疫苗，见细仔同打咗针嘅老妈子都冇乜副作用，我先放心离开佢哋一阵，返嚟搵吓食，趁可以郁动到，都唔想提早十年退休。」采访：方骞平

身处香港一间酒店隔离中嘅乔宝宝，好快又同香港观众见面。他表示，𠵱家英国疫情算系受控，50岁以上嘅中老年人，同埋长期病患亦优先处理晒，𠵱家去到40岁群组：「所以我哋一家人都打晒针，包括行动不便嘅细仔，而大仔系照顾者都系优先类别，不过，喺今年一月未接种前，住喺里斯达城嘅家姐、姐夫、外甥两公婆及外甥子女，全家都中咗招，姐夫病足10日，辛苦到连嘢都讲唔到。」

印度家人大部分已移民
乔宝宝虽然有高胆固醇，但打疫苗前都唔惊得咁多：「我同老婆分别出现手臂痛、发冷及发烧情况，休息咗3日就冇事，反而细仔及妈妈打唔同牌子疫苗就冇乜副作用。」提到印度疫情严峻，确诊人数不断上升，宝宝嘅亲人经已移居加拿大同英国，只有一啲乡里及老婆亲人仲留喺印度北部旁遮普邦，所以好少返去：「相比起印度中南部，疫情严重好多，尸体多到排队烧都烧唔切！冇办法啦，啲人危险意识冇咁强，大多数唔戴口罩，宗教又多，政府又松懈，成个印度打到两针疫苗嘅占人口都唔够2%，所以自3月出现变种病毒后，情况一发不可收拾。我老婆有个30几岁亲人就咁样『到顶』，𠵱家真系要打咗疫苗先可以救到命，好似邻国不丹咁，超过9成18岁以上嘅人口都打咗针，佢哋暂时得1单死亡事件。」