直认曾抗拒郑嘉颖 陈凯琳妈妈赞女婿101分

本周日适逢母亲节，陈凯琳（Grace）母亲陈刘惠娴（Connie）应车淑梅邀请上电台节目任嘉宾。Connie将迎来一个更热闹的母亲节，因为Grace的孖生弟弟为她娶了个新抱，Grace也为她多添了一名孙儿。Connie透露子女们已预告，母亲节或会为她亲自下厨，又或与她外出用膳，笑言已准备任由他们摆布，总之健康开心，日日都是母亲节！
曾有人将香港小姐冠军女儿Grace与龙凤胎弟弟Derek的混血儿标致外貌与大女儿Joyce作比较，坊间亦流传大女儿曾因妹妹较漂亮而感到自卑，Connie回应：「其实Grace同Derek龙凤胎出世嗰阵同大家姐一样非常白净，但突然喺14、15岁嘅时候眼大咗、脸尖咗，阿仔须根多咗，可能我嘅妈妈系马来西亚人，拥有亚裔嘅容貌，细佬又喜欢户外活动，又或者加拿大嘅食物有好多荷尔蒙啦！」Connie续谓：「大家姐Joyce比较运动型、率性、唔计较，系好柔和嘅人，相反Grace3、4岁开始已经唔著裙就唔肯出街，有一次去海洋公园，佢硬要著裙，否则佢宁愿唔去，结果佢真系选择留喺屋企。坦白讲Joyce 14、15岁进入青春期，我真系问过佢『如果有人话妹妹靓过你，你会唔会唔舒服？』Joyce直说唔会：『Grace系我妹妹，每个人都靓，只系角度唔同，其他人唔可以用容貌去分裂我哋，否则我会将话题停止。』」Connie又谓：「Grace好爱家庭，好爱家姐、崇拜家姐Joyce好有创意，屋企嘅聚会都系由佢安排，令到所有人都好开心。」

对Grace事业刚起步便受到郑嘉颖热烈追求，传闻当时陈妈妈并不接受，Connie直认不讳：「系呀！一、我唔认识佢 （嘉颖）；二、听闻佢好花弗；三、年纪都有少少影响，怕佢只系玩玩吓。但我唔可以一刀切，始终大家都系成年人，我初时唔想见佢，因为我惊唔知点面对佢同相处。我真系好惊，好唔开心，唔知点算好，因为呢次系Grace嘅初恋，Grace就提议大家分开祈祷，结果，祈祷中，上帝要我主动去认识佢。」Connie又坦言：「因为我重视婚姻，工作、交友等等可以转变，但婚姻要好谨慎，唔可以『合则来不合则去』。记得第一次见面，佢（嘉颖）好热情，好有礼貌，讲嘢唔会左顾右盼，实话实说，系个诚实嘅好孩子，好值得我尊重，我哋大家以成年人嘅态度去沟通。我心入面系唔应该谂佢抢咗我个女，或者佢哋两三年之后会散啦，更唔应该无奈地、死死气地承认佢哋一齐，于是我继续祷告，经过多次沟通，我哋先至互相接纳，至可以融为一体。」
问及Grace与嘉颖拍拖三年便结婚是否太快？何谓Right Timing？Connie觉得大家成熟、觉得适合，便是Good Timing。「我闻讯大大祝福，非常祝福，送上从上帝而来嘅祝福！我呢个女婿好热情，好尊重我哋两个老人家，第一次见面就送我老公一支极名贵红酒。平时我同佢（嘉颖）常用微信通信息，我凑紧孙又会打电话畀佢，佢又会即刻接，我哋冇隔膜！」 Connie大赞女婿：「郑嘉颖结婚之后，我更加认识佢，佢以家庭为重，重到我要叫佢减啲，唔好咁夸张，佢成日问，两个仔大咗会唔会够钱用，惊住通货膨胀，成日问老婆舒唔舒服，我话佢依家已经好好，佢话应该仲可以好啲，成日叫Grace唔好悭钱，要用就用！佢又会神神秘秘买个靓手袋送畀Grace，仲同Grace讲『唔知点样去多谢你，我真系好爱你！』佢 （嘉颖）对妈妈、家人甚至工人都好恩待，我以为佢系讲嘢大声嘅大男人，原来佢好细心、好窝心、好体贴！我呢个女婿好似红酒，初试一啖未开透，未饮出味道，一路饮一路开，味道会变化多端，愈来愈好，可能以后仲会有另外一个境界！我好爱佢，真系好爱佢，佢好抵锡！我畀佢101分，嗰一分系上帝额外加上去嘅。」