【独家】首次挑战演大状压力大蒋祖曼感激有黄智贤照顾

2021-05-13 20:00

蒋祖曼（Joman）最近在新剧《逆天奇案》首次挑战大律师角色，她承认压力好大，好彩监制刘家豪好贴心，预早给她剧本做准备，但法庭戏近尾声才拍，令她惊足全程。幸好初次合作的黄智贤好照顾对手，知她是电视城新丁会经常提点她，但她又笑指黄智贤角色追女却坚离地，如果老公照做会畀她闹。采访：杜淑霞

Joman虽然并非第一次拍TVB剧，但是未试过长时间在TVB录影厂开工，「之前拍《使徒行者2》嗰几个剧都系用实景多，真系未试过搭厂景拍，对我嚟讲好有新鲜感，但系因为少喺TVB开工，又唔系好熟路，变咗好似个新丁咁，好多嘢都要问人，真系几搞笑㗎！」

好彩Joman有剧中的「追求者」照顾，「今次我有九成戏系同Ben（黄智贤）合作，虽然同佢第一次一齐拍剧，但系佢好照顾对手，好多时系佢发现有问题主动提我，真系好多谢佢！佢现实又系个好好先生，成日买埋餸先开工，虽然我唔认识佢太太，但系觉得佢哋真系好幸福㗎！不过个剧入面，佢演嘅『Nic Sir』追女仔就好离地，会包戏院啲位陪睇戏，好鬼夸张，如果我老公系咁做，一定畀我闹佢嘥钱呀！哈哈！」

不过，对于初次演大状角色，Joman就要靠自己冇人帮到手，「入咗行咁耐，今次真系第一次演律师，仲要系个大状，所以都有唔少法庭戏，啲对白又长又难记，好彩家豪哥（刘家豪监制）好好，佢未开工之前两个月已经畀定剧本我，等我可以多啲时间做准备，但系要就厂期，所以排到近尾声先至拍啲法庭戏，所以我惊足咁耐，真系好大压力，怕自己记唔到会累街坊，搞到大家迟收工就唔好，好彩都算顺利完成，原来自己记性都唔算太差，真系有啲似当年考公开试感觉呀！」