【天长地久】故事伤痛凄美杨淇怕爆喊 白只拍戏被定型破格演惨情戏

游学修、杨淇、DJ当奴、白只、朱栢谦等主演，改编自小说《甚麽天长 怎样地久》的舞台剧《久天长地》于9月24日在演艺学院开始演出，日前众人齐集拍摄海报。白只今次转做惨情戏：「其实我舞台剧界一直都系做喜剧，但系自从拍咗电影畀人定型我系好阴沉嘅人后，连今次舞台剧都要做惨情戏，不过叫做有得做正经戏，一尝心愿啦！」

近期他不停演出舞台剧，笑言自己不是「转行」：「咁我都系舞台度出嚟嘅，只系中间走过去做音乐，得闲又去吓做电影，呢个时势有剧搵我，梗系返翻嚟『屋企』啦！其实𠵱家我都做紧几个骚，寻晚我排剧排到半夜，之后赶嚟呢度影相，影完就要即刻返去排戏。」

而女主角杨淇就率先剧透，自爆角色要死足几次够晒凄美：「因为故事都有穿越成份，所以都预咗要死足几次，其实今次个剧本都『惨惨地』，不停要我哋勾返起痛嘅感觉，我都担心排戏会喊到收唔到声，加上做舞台剧系现场对住观众，如果要心痛到晚晚流眼泪，咁就真系演技大考验。」

未埋位前众人有讲有笑，但当奴不时「愁眉苦面」未见太兴奋：「我唔系紧张，只系监制要求我哋比一个『最痛』嘅表情出嚟，咁我哋呢啲『偶像派』净系『Chok』开，加上平时做节目都系带欢乐俾人，好少要个惨样示人，所以埋位之前都要时间入吓戏。加上今次啲拍档个个都系戏精，自己都要闭关练吓。」

同场的游学修型格上阵，很快投入痛心嘅情绪，他指同剧演员够晒份量，舞台上交流过足戏瘾：「因为今次大家关系都好Close，好似我同白只系校友，导演系白只演艺学院嘅老师，监制又系演艺大师姐，喺前辈面前更加要打醒十二分精神！过去一年我投放比较多嘅时间喺网媒度，呢次重踏台板感觉都有啲啲唔同，但作为表演者系享受观众即时畀你嘅反应，所以好想快啲到九月开骚。」

监制张佩华指最早鸟预售反应甚佳，观众「饿」了颇长时间，对公开现场表演甚为期待，加上这次演出故事、剧本同演员都很紥实，团队上下有默契，公布演出之后收到大量内部留票，所以信心十足，决定优先订票加开两场。