【独家】佩服《造美人》参赛者勇气强尼沈殷怡练美娟都想整靓自己

2021-06-11 00:07

强尼、沈殷怡（Shirley）及练美娟（娟姐）主持ViuTV另类美选真人骚《造美人》，三人都坦承好佩服一班参赛者勇气，要挖自己最丑一面出来，亦被他们努力改进自己而感动，令他们都想积极提升自己，娟姐更去做割掉声带瘜肉手术，搵番把靓声；而讲到整靓自己，强尼想整靓棚牙，Shirley想抽走个双下巴，娟姐就想抽脂减肥。撰文：杜淑霞摄影：谭壹致服装：wagamamaplayground(强尼)、suncoo(Shirley)、MARYLING(娟姐)

强尼认为传统选美参赛者自信是靓女而参加，今次则刚好相反，「呢个节目女仔系觉得自己丑样或者唔靓先至嚟，佢要付出嗰个决心系大一百倍，系我觉得自己唔掂，叫人帮我搞搞佢，自信嘅低系好低，你要挖出嚟畀人睇喎！话晒自己有咩唔好，想嚟希望有个改善，真系好赤裸。」

娟姐割声带瘜肉

三人都话去年12月录影节目开始，受参赛者影响主动去运动减肥，强尼更爆娟姐仲做埋手术，「你微调咗把声，都算系改造嘅一部份。」问娟姐几时发现声带有瘜肉，强尼即抢答：「细个开始蒲咪有罗，哈哈！」娟姐谓10年前发现，但一直冇处理，到拍《造美人》令她扚起心肝做手术，「呢把声会有更多可能性，拍嘅角色嘅范畴，做主持，我呢把声真系可以做啲大骚，以前把声真系唔出得大场面。（有啲自悲？）真系有，做咗微调或者呢啲改变，令我有信心同有能力去做呢件事，呢个节目畀咗我好大改变同启示。」

讲到整靓自己，三人都绝对赞成，Shirley就话想整走双下巴，「我系以呢个双下巴闻名，再咁样落去好困扰，但系都知道唔容易，要抽走一定系大手术嚟，听闻要几个月因为要动刀，都系算啦！学娟姐话斋食少啲！」强尼亦想整靓棚牙，但怕影响讲嘢，「由以前讲波都有谂，但我嘅工作系不停咁讲嘢，我唔想影响我口齿嘅灵活度，咪一路冇整。」而娟姐自信话块面冇嘢要整，「有整容医生同我讲，你个样所有嘢都好好，如果真系要整就抽脂减肥抽走廿磅。」畀强尼笑话，「廿磅够唔够先？」