【独家】《中女唔易做》试做「炒散王」杨思琦开心婚后有更多私人时间

2021-06-03 23:30

杨思琦最近在ViuTV真人骚《中女唔易做》体验做「炒散王」，大学毕业即选港姐入行的她，首次做其他工既新鲜亦觉困难，令她忆起年前要母兼父职，要照顾女儿卓颖又要周围飞工作，去年结婚后终有丈夫帮助照顾一对仔女，可以向仔女「请假」唞唞气的她，更跟朋友试玩恨了多时的Wakesurf（无绳滑水）。撰文：杜淑霞摄影：谭壹致服装：Perme

思琦在《中女》中尝试了花店店员、珍珠奶茶店店员、生果店店员和派传单，她认为4份工都能胜任，但最不想做派传单，「我怕嘈，喺港铁站门口人来人往，好头晕，企得耐只脚会好辛苦，但系我冇谂过冲嘢饮都要兼顾埋洗厕所，呢个要过自己心理关口，呢次体验先至知要兼顾埋呢啲嘢，好彩我都应付到。」

「请假」玩Wakesurf

有了这次工作体验，令思琦更加佩服一班职业女性要两边兼顾，亦令她想起自己身兼父职的单亲日子，「我都曾经有咁样嘅经历，有时唔知点样安排小朋友，好想摆佢喺身边，又要出埠见唔到，就算我返嚟做全职妈妈去照顾佢，都系好辛苦，因为只有一个人去照顾佢，有另一半嘅帮忙系会好好多。（当时点同囡囡解释冇爸爸？）呢个家庭里面我就做咗两个角色，颖颖都会知道，𠵱家更加好啲，佢会开心咗，多咗个人（后父）关心。」

思琦承认婚后反而多了Me Time，最近更开心跟朋友出海玩Wakesurf，「最近一次几好玩我去滑水，平时我都唔系咁活跃主动，但我成日睇到滑水嘅片，或者碌IG会见到，我真系好有兴趣去试吓玩，咁啱朋友讲开，好似我心里面条虫咁，最后摆低啲小朋友去玩，真系好开心。（请假？）系啦！尽量去安排吓去唞啖气轻松吓，都系一个好嘅开始，做到自己锺意又未试过，我都好想再试吓，好玩好刺激，算系畀自己一个奖励。（仲有咩想试？）想学吓空中瑜伽，几好玩，嚟紧会开始去寻找吓，之前真系冇呢个谂法。」