【独家】恶死老窦　森美躁底子女学足　陈豪严管野蛮孻女亲自教功课

所谓「有其父必有其子」，父母就系仔女面镜，影响真系可以好大。陈豪（阿Mo）和森美最近为真人动画《比得兔2：走佬日记》粤语版配音，两位型爸接受《头条日报》访问时，大谈凑仔经，虽然二人均自认严父，但前者是「鼓励型」，后者则属「躁底型」。森美大赞阿Mo识得身教，后悔过去自己控制唔到情绪，搞到一对子女似足自己乱发脾气，好欣赏温文尔雅的阿Mo育儿有方。不过，阿Mo却踢爆7岁大仔Aiden好百厌，仲教唆6岁二仔Nathan一齐捣蛋，并坦言已开始严管5岁野蛮孻女Camilla！撰文：黎宝伦　摄影：张咏森

森美和陈豪于真人动画《比得兔2：走佬日记》中，分别再为「比得」及「宾仔」声演，故事讲述碧雅（露丝拜恩　饰）将比得的顽皮事迹写进儿童书，搞到人人当他是百厌星，更常被「爸爸」汤玛士（当劳格利逊　饰）误会兼责骂，于是比得决定离家出走！

对妈咪驳嘴驳舌
现实中，身为DJ的森美称儿时并唔曳，功课做迟一个钟已自觉好百厌，但却坦承最叻驳嘴。回想小学5年班被妈咪打，当时他竟反驳：「你有咩资格打我呀？你又唔系上帝！」事后见妈咪垂泪帮他捽药油，森美才知道对方很锡自己，故现时对子女发了脾气，也会搵机会向他们解释，「每个家长总有一、两次控制唔到情绪，但记住话番畀佢听点解闹佢，要畀佢知道你锡佢、关心佢。」曾患抑郁症日日黑面、挑剔人的他，睇到子女长大后有样学样，也认为身教十分重要，并赞阿Mo教得小朋友乖巧又快乐。

大仔撩细佬搞事
主张鼓励子女多作尝试的阿Mo，让小朋友从错误中学习与成长，作为家长也应尽量管理情绪，透过讲道理教育下一代，但他直言，若仔女打交便会马上喝止。三个仔女中谁最百厌？阿Mo爆大仔Aiden似足戏中的「比得」，「佢好聪明、好多主意又会坐唔定，四围搞事，但开始有『我又衰咗喇』嗰种心态。（带头捣乱？）佢咪同细佬讲『你咁咁咁』，叫佢去做罗，但细佬好乖、好听话。」又指二仔Nathan似自己，虽然食饭、做功课慢吞吞，但会自己妥当完成；而孻女Camilla则较野蛮任性，同时也很讨人欢心、好嗲兼贪靓。

督促仔女做功课
问会否偏心锡住囡囡？阿Mo否认，更称比教仔更严，「佢好细个已经表现到有啲对抗，所以要畀佢知道需抱住认真态度去对待功课、老师，佢嬲我都冇计，你笔划错咗，我就擦晒佢，你再写错，我擦一百次都系咁，直至你学识为止。」语毕森美抵死笑指，试过将儿子的「核突功课」擦晒，岂料大懵没告诉囝囝，仲要怪对方欠交功课，结果囝囝楚楚可怜向他解释：「我做咗㗎！但返到去一打开成版功课冇咗。」森美续笑道：「当时我唔岀声，叫佢写番好，仲话佢『你返学唔Check吓功课先岀门口㗎咩？』哈哈！」