自爆十几岁曾订婚 陈秀珠谈做单亲妈咪感触落泪：小朋友会有缺失

62岁的陈秀珠（珠姐）作客黎芷珊主持的TVB访谈节目《单对单》昨晚播出，21年前毅然决定独自生下儿子的她坦承，作为单亲母亲确实压力不少：「要照顾个仔啦、要工作啦、要靠工人姐姐啦，我妈咪又一早走咗，所以阿仔以前成日夺命追魂Call我。」予人感觉硬净的珠姐，自言很眼浅，谈到近年与儿子关系有所改变时，她即忍不住感触落泪：「单身如果有小朋友，有时真系对佢…我以为我好强，咩都可以搅掂，原来小朋友系会觉得有缺失。我问过佢妈系咪好好？系咪冇爹哋都OK？佢就话：『你觉得啫』，系冇得补偿㗎。做单亲妈咪唔系唔好，但要考虑好多嘢，唔可以只系谂自己，要谂小朋友。」

珠姐续指儿子小时候并不好奇父亲是谁，但长大后反而想法不同，但珠姐却依然对儿子父亲身份守口如瓶：「我觉得唔需要，佢知道咗又点？全部冇人知（父亲身份），就算系亲密嘅朋友。」她透露得悉怀孕一刻其实很挣扎、但决定要生下儿子是因为觉得「小朋友唔系想有就有」。芷珊问到若重新选择会否再做同一样决定时，珠姐断言：「一定唔会，亦唔鼓励人做。」

热爱运动的珠姐，在节目中打完网球再带芷珊玩草地滚球，她笑指捱了20年，是时候「放生」自己及儿子，她又指夫妻及男女朋友相处之道亦需如此：「要各有空间，真系会感情好啲㗎。唔好抓得咁紧，要收放自如。」珠姐闲时更有学韩文，皆因她是煲剧狂热份子，她指当初爱上韩剧全因看了《咖啡王子1号店》，但其实当年第一眼觉得男主角孔刘很丑样，相当搞笑：「睇睇吓觉得剧本好啦，佢又做得好好啦，咁就因为个角色而锺意咗，之后觉得佢成个人都好靓，跟住就开始追佢啲戏。」

有话直说的珠姐，更与芷珊分享了一个秘密：「中学毕业嗰阵，大概十几岁，因为男朋友要去外国读书想定落嚟，就订咗婚，都有摆两、三围酒㗎。仲要系我追佢，因为佢实在太靓仔喇。佢真系好好嘅，但我唔好，我做嘢之后见到太多新嘢…呢段感情我系要同佢讲对唔住，因为hurt得佢太紧要。」