【独家】童年百厌 曾掉藤条落街避打 Jer罕提母子情浅谈女友

「金Jer暖男」（柳应廷）早前频频被《头条日报》发现陪女朋友Kelly shopping，sweet sweet！不过身为「暖男」的阿Jer除了对女朋友好，对屋企人一样咁有心嘅，讲明有时间除咗见女友，仲一定会抽时间陪屋企人。最近他推出新歌《砂之器》大讲母子情，连MV都劲催泪，他自爆畀柳妈妈睇时搞到对方眼湿湿，更透露原来他当日成为「金Jer」时，柳妈妈更加感动落泪，有妈咪呢个强劲后盾，成为他努力向前的原动力。撰文：杜淑霞 摄影：张咏森 造型：PIPA Creative 发型：Man Chan@CHIC Private I Salon 化妆：Giann Cheung@AnnieG. Chan Makeup Centre 服装：Celine、Giuseppe Zanotti

新歌《砂之器》是阿Jer的「重生三部曲」继《狂人日记》后第二部曲，跟前曲有一连串关系，「经历咗《狂人日记》嘅『狂人』破坏同身边、屋企人所有关系后，点样去面对番啲关系，你面对啲破坏咗嘅关系，你会有啲咩决定，我自己嘅choose就系想讲『对唔住』，同埋希望对方原谅我，就算系上一世『狂人』同佢嘅屋企人，延续或者转世去到今世妈妈同个仔呢个关系，你点样去面对佢，所有嘢好似追看性嘅电影。」

《砂之器》MV中，阿Jer同妈妈关系极差，阿Jer坦承现实跟角色相差甚远，但也有过叛逆时，「我又未去好似MV咁离家出走咁大镬，细个有反叛俾妈咪打过，好似系我同家姐闹交，佢用藤条打我哋，我同家姐之后将支藤条掉咗落街，哈哈！我谂嗰时十岁八岁（掉咗等妈咪打唔到你？）系呀！哈哈！（同MV收埋妈咪包烟有异曲同工之妙）系嘅，但系又唔会好似MV咁，我听返嚟好多朋友会好似MV咁。（你性格唔系呢种人）都系！变相俾我睇到另一个世界。」他坦言演绎时有一定难度，「尤其系感情戏有起跌，最尾仲要喊喎！唔系咁容易。但喺现场一听呢首歌就莫明其妙好有感受，好容易代入喊得出，同埋故事简单易明，我系谂住自己妈咪，亦都希望提醒住自己要更加珍惜屋企人罗！尤其自己好忙好少返屋企，返屋企佢哋都瞓咗，早出晚归好少见到佢哋个样，哗！你见到佢哋转变嗰吓感受好大，好似首歌咁『望母亲突然白了首』系最touching。」

入行首年压力大

家人一直好支持阿Jer追梦，他第一时间将作品畀柳妈妈睇，「佢都多感受，因为呢首歌除咗讲母子关系，系由十月怀胎讲起，对于每个妈妈嚟讲，十月怀胎系毕生难忘嘅事，我谂呢个MV令佢谂番起佗BB凑大到我𠵱家廿岁嘅过程，佢都觉得窝心。（妈咪有眼湿湿？）佢成日都眼湿湿，例如佢见到我工作到𠵱家，或者见到我喺台上攞奖，佢都好容易感动到喊嘅。（攞金奖时？）佢有㗎！屋企人讲，佢应该系感动到滴咗几滴眼泪嗰啲，又未至于激动地喊。（睇见妈咪咁会感动？）都系一个力量去畀自己行落去，屋企人对自己认同，佢哋不嬲都好support，如果有再多啲认同，我会更加有信心去做多啲自己想做嘅嘢。」

讲到争取时间频频同女朋友Kelly shopping，阿Jer坦言有压力，「都有少少嘅，哈哈！但系冇得避免，作为公众人物，自己言行留意吓罗！」对于「暖男」行为，陪女友又细心帮手攞嘢，阿Jer觉得有需要，「我觉得身边嘅人都要抽时间陪，除咗所讲女朋友，我觉得对屋企人都要摆时间，始终系一段关系嚟，关系要用时间或者用一啲行动去维系罗！（咁忙点分配？）尽力罗！冇时间都要摄时间出嚟，如果冇时间去维系，嗰段关系就会冇咗。」

重情的阿Jer对兄弟亦一样好，《调教你MIRROR》曾爆喊讲过为Anson Kong未能夺新人奖耿耿于怀，甚至宁愿自己冇奖，他坦承节目后大家感情更好，「我本身系好care身边人感受，都希望大家除咗工作合作，相处系好开心，大家唔好有条刺喺中间，呢个节目对我、对其他人帮助好大，将呢条刺掹走咗，完咗节目大家都好开心、融洽好多，好直接咁讲嘢，男仔系爽快啲同埋容易唔记得啲嘢多啲。」他又透露入行以来第一年最大压力，「第一年加入MIRROR，完全系做一啲唔系自己想做嘅嘢，我系想做歌手㗎！第一年唱嘅机会又唔系好多，净系唱到团歌，又要跳舞，跳舞自己又唔叻啦！所以有好多压力，又要见住姜涛同Ian单飞，见住佢哋会谂『点解人哋做自己想做嘅嘢，我唔可以有自己嘅嘢想做』会有呢啲感受，呢啲都系过程同经历嚟，如果冇当时嘅我，唔会有𠵱家嘅我。」