【独家】拍《刑侦日记》太入戏郁啲𤷪𤺧 姜皓文被老婆劝睇精神科

演员向来都系攞自己情绪来搵食，有时太投入角色，好易搞到情绪失控，连经验老到、外界大赞演TVB剧《刑侦日记》出色的黑哥姜皓文，原来拍完成年都抽离唔到忆妻成狂患上躁郁症的「聂山」角色。黑哥自爆当日为瞓身投入演「聂山」，又惊疫情严峻影响家人，拍摄两个多月专登搬去酒店独居，惯咗有全屋「女」陪突然对住四面墙，讲番呢段挂老婆挂到甩肺日子，向来man爆的黑哥竟忍唔住眼湿湿，而他拍完该剧情绪起伏依然好大，太太殷宁更提议他搵精神科医生帮手。撰文：杜淑霞 摄影：谭壹致 发型：Jeff Wu化妆：Herry Lai

外界大赞黑哥演「刑侦之父聂Sir」掂，更推举他问鼎视帝，而黑哥本身亦认为演的躁郁症角色同剧本都好正，「躁郁症病发之前系非常之冷静，只不过佢有一点会忽然间情绪高涨，好兴奋，如果咁样嘅情况之下撞到啲唔开心事，就会将佢扩大，会一发不可收拾，会情绪高涨到标冷汗又晕，嗰吓会控制唔到自己，同埋会谂好多负面嘅嘢，所以我觉得个剧本好正，你系好难会撞到电视剧会写到一个咁正嘅剧本，我睇完剧本我去演嘅时候系惊嘅，一路惊住返工唔识演，因为真系好难演。」


未能抽离挂住老婆


曾透露过有时太入戏，搞到情绪差影响夫妻关系的黑哥，见到今次角色难，加上疫情影响，不想太太、家中6只狗女及猫女增加染疫风险，索性自我隔离搬到酒店住，「我开工接触人多，屋企好多小朋友，有猫猫狗狗，如果佢哋要隔离佢哋好惨，佢哋要掉咗去唔知咩地方隔离，所以一定唔可以畀佢哋有事，唔可以畀屋企有事。我呢次直情返唔到屋企，除咗疫情，我自己安排咗自己隔离，想一个人对住个剧本去做呢个状态。」



这段自我隔离冇得见家人的日子，黑哥提起都怕怕，「拍咗两个几三个月，同老婆分开自己隔离咗，一收工对住几面墙同张牀，老婆或者姐姐送饭畀我食，送完佢哋就走，剧本会有我同陈炜嘅夫妻戏，幻觉会见到我老婆，唔知佢喺边，但放工返到去又真系见唔到我真正嘅老婆，我试过忍唔住打畀我老婆，『你可唔可以过嚟，你不如买碗糖水我食啦！』（好挂住佢？）系呀！（你讲起都眼湿湿喎！）谂起都觉得心慌慌，到𠵱家都屈住喺度唔知想点咁，个画面又系咁，个剧本又系咁，所以个人唔知系咪抽离唔到，但系我觉得呢样嘢每一个戏都会发生，只不过呢排成日都《刑侦日记》，所以过一段时间可能会好啲罗！」

享受为角色牺牲


原来《刑侦》煞科后，黑哥为安全起见，再隔离多两个星期才返家，但他觉得为了好角色牺牲都好值得，「嗰两个礼拜就放松少少，老婆多啲落嚟睇吓我，戴住口罩可以出去见吓面，可以去露台出面，但系好享受嘅，演员嚟讲曾经有个剧本可以令到你挑战自己嘅情绪，挑战得咁厉害，系开心嘅，但系要唞一轮先，我要拍喜剧呀！」到真正返屋企，最搞笑是得黑哥自己开心，「哗！好开心！但佢哋对我冇乜嘢，太太对我又系咁，所以好跳（情绪）罗！个感觉好得意，我返到去佢哋当若有其事，（得自己兴奋？）系！好似好新鲜咁，揽住我最细嗰只狗仔，个人平伏番，接番屋企嘅生活。」



不过原来黑哥返屋企后，情绪依然受角色影响好深，搞到太太殷宁建议他睇精神科医生，「我老婆话我未拍之前都要调整情绪，佢都话想安排精神科医生畀我睇，到拍完之后我老婆话，『你真系要睇吓医生』佢咁讲我就惊啦！唔系嘛！因为我有时少少嘢会歇斯底里，好少事都会唔开心，容易𤷪𤺧，容易小气，容易唔开心，唔知系咪更年期。」黑哥暂时未有真正求助精神科医生，因相信靠自己可以调节到心情，「我觉得可以调教嘅，可以调教番开心啲，或者释放啲情绪，唔好咁多嘢抑压，我谂系得嘅。」