【独家】《神奇小子》演苏妈 由26岁演到46岁 吴君如日喊5公升眼泪拍到好攰

做人阿妈甚艰难，作为伤残人士妈妈更加唔容易，而残奥六届金牌得主苏桦伟母亲苏韩小贞肯定是个非一般妈妈，而吴君如最近在电影《妈妈的神奇小子》饰演苏妈一角，身兼监制的她承认好大挑战，因角色要由26岁开始演，横跨20年，日日拍感情戏流足「5公升眼泪」，不过她获苏妈亲自验证演得神似，更形容看到君如演绎令回忆涌现「直情打落我心肝」。睇到苏妈和苏桦伟母子感情好，亦令君如审视跟15岁囡囡陈是知关系，要尽量似朋友相处，又会专登安排囡囡探班，甚至给她客串演出机会，让她了解工作实况多沟通。撰文：杜淑霞 摄影：谭壹致 发型：Seiko Sin@Hair Culture(吴君如) 化妆：Midco Chu(吴君如)

君如今次演出该片全因好友古天乐相邀，「古仔同我讲咗个故仔，我觉得呢个故仔好感人好励志，同埋系好有治愈力，就接受呢个挑战，当时古仔同我讲，如果你肯接受呢个挑战，就要做埋监制，我哋合作咗好多年，由我第一部做监制（《金鸡SSS》），佢又支持又主演，佢话『如果你得嘅话就交件事畀你啦，我就做出品人，我出钱你就出力啦！』我接受呢个挑战后，开始同导演埋班。」君如坦承今次做监制跟以往不同，戏里戏外都有点阿妈feel凑件事出来，「今次好好全部系新人，包括导演都系新导演，演员几乎都系新演员，我觉得个责任几好，可以提携下新人，自己呢个年资好啱同啲新人合作，虽然导演经验都好丰富，但佢又做埋编剧，有好多嘢成日迷茫咁望住我，所以我个位就系监人制。」

君如形容演苏妈是个好大挑战，首先是在年纪上，「我第一个问题问导演，其实苏妈几多岁生苏桦伟，佢话26岁，我觉得咁都好啲，演26岁，我几惊苏妈16岁生苏桦伟，咁我真系一额汗，我点演16岁呀！咁就真系大挑战，26岁都OK，我可以拿捏番26岁，总之横跨20几年，我觉得都OK，啱我嘅年纪一路成长。」年龄问题应付到，但感情戏令君如日日拍到揪心劲攰，「我场场都好攰，场场成日要起伏得好劲，又要成日流眼泪，每日都要流5公升眼泪！我哋真系冇玩过，拍嘅过程同阿炳（演苏桦伟演员梁仲恒），佢日日去到就喺度跑同埋训练，我去到又要准备情绪，我哋真系拍完都未倾过偈，唔系好似拍喜剧个气氛，𠵱家宣传先坐埋喺度笑吓咋！」

苏妈赞君如演得神似


导演尹志文早在8年前已搵苏妈攞料，虽然苏妈笑指导演「畀咗7、8年麻烦我」，但其实很渴望电影拍得成，「成日觉得香港地商业为先，个心觉得冇乜机会拍得成，后尾真系知道拍得成，开心到几晚瞓唔着呀！」苏妈得知君如参演更加兴奋，「第一次见你（君如）仲请我哋食靓嘢！（吴：因为伟仔锺意食牛扒嘛！）又有得食又有得见面，你知啦天王巨星好多人都想见佢㗎嘛！（最初知君如演？）我真系唔信，第一我年纪大佢咁多，第二佢系天王巨星，要演呢个角色要由后生好师奶型，好普通女人嘅穿着出现喺大个荧幕喎！真系纡尊降贵！」苏妈又赞君如演得神似，譬如在苏桦伟4岁时仍未识行一场戏，已令她狂标眼泪，「哗！我睇到即刻自己谂番晒以前啲嘢，即刻标眼泪，演得真系好似。直情系打落我心肝，扣住我心肝，呢个真系好深刻，呢个位我睇到即刻喊！」


君如睇到苏妈和苏桦伟母子关系好，亦庆幸跟囡囡陈是知关系似朋友，让囡囡多了解她工作令大家沟通更好，「我每次开工话畀佢听我拍紧部咩戏，我亦都同佢讲，你系一个健全嘅人真系好幸福，我成日都有同佢分享，每部戏佢都嚟支持我，佢有嚟探班，次次都叫我畀佢做茄喱啡，今次都有，出咗一秒！（边个位？）大家自己搵吓啦！佢知道呢套系关于残障运动员，佢有见过苏妈，可能苏妈冇留意，佢系个你（苏妈）唔会起眼嘅靓妹嚟。佢啱啱15岁对演戏对我哋拍戏嘅世界都系好奇，所以佢成日都有嚟探吓我班。我会话畀佢听阿妈做紧乜嘢，尤其是个咁有意义嘅故仔，我话以后你畀心机，我每部戏都会畀一秒你出现，如果你再畀心机啲，我就畀一个字对白你讲，我呢个阶段都系当佢朋友咁样相处。（佢对做幕前有兴趣？）细路仔实有㗎喎！佢都锺意自己拍片自己剪，啲细路仔呢个阶段实会，但佢都知道呢行好辛苦，（佢有探班就知？）系呀，唔会以为咁易完成一部电影，要经过好多人努力先至畀人见到，佢完全明白，我同爸爸（陈可辛）都系做呢行，实有接触机会。」