【独家】跟蔡颂思陈雅丽推生酮月饼唐贝诗经常忟憎为份量拗餐死

2021-08-19 00:30

唐贝诗（Lydia）、「40亿千金」蔡颂思（Jocelyn）及陈雅丽（Allie）3位好姊妹成立自家生酮系列甜品于网店出售，继曲奇后再推出生酮月饼。3位老板希望将健康食品share畀所有关注健康嘅艺人，Allie最想送畀为食姜涛，因为就算佢狂食都唔怕变返做肥仔。采访：方骞平摄影：谭壹致场地：Paragon Studio

去年中秋节前夕，三位老板曾学做低糖月饼送暖，之后灵机一触变成商机。「财政大臣」陈雅丽话今次月饼项目由成本至包装都好贵，共投资6位数，总之将以往赚到嘅掟晒落去，单系造饼配方都研究咗5个月。

食足100个月饼
「大厨」蔡颂思坦承曾经好气馁：「最初面对朋友负评都唔好受，佢哋话『我哋唔会畀钱买』、『椰挞嚟㗎？饼店买10几蚊个咋喎！』由于太揼本唔会有退路，我哋不停食不停再试，至少食咗100个，最后都做出成果。」陈雅丽从造饼过程启发人生，就算遇上挫折都要勇于面对。唐贝诗亦曾有忟憎时间，单系每个月饼嘅份量都拗餐死，好彩系3人组合，投票就解决到问题。Jocelyn最想送月饼畀当年搵佢做舞台剧嘅恩师张达明；Lydia就想送畀Sammi，因为见佢喺网上食嘢好吸引，而Allie就答：「𠵱家个个都想送礼畀MIRROR，但唔知佢哋肯唔肯收我哋嘅心意，其实我哋好欣赏姜涛，佢为咗Keep fit成日要节食，只可惜我哋未够钱搵佢做代言。」