【独家】26岁似40岁体格狂操回春倪辰唔敢再谈Long D爱情

2021-08-22 21:15

倪辰（Lala）早前举行首个个人骚《Music in Lalaland音乐会》，当中演绎近20首歌曲，令26岁平日冇做运动习惯的她，即时暴露身体机能似足40岁，日前她即搵健身教练帮手，希望练好体魄迎接未来工作。讲到亲自作曲新歌《无床共枕》坦承是真实写照，试过两段Long Distance（Long D）爱情的她，发觉远距离爱情太难成功。撰文：杜淑霞摄影：谭壹致场地：King's Fitness

向来身子弱的Lala，开骚前压力大更加疯狂病，「嗰排连续个几月都喺度病，生唇疮成个嘴肿到孖润肠咁，各式各样嘅敏感出晒嚟，又肠胃炎，所以唔瘦都好难。」开骚又唱又跳20首歌后她更觉唔掂，「对住镜头做紧骚仲识笑，但系一完咗成个人谢晒，衰老咗几年，希望做运动可以回春。我好似老人家咁，我廿几岁好似人哋40岁嘅体格，人哋望落去『你好瘦底，应该好似成日做运动』，其实我唔做运动，平时只系食少啲嘢。如果由𠵱家开始做变成一个习惯，我谂到时就会好轻松。」

新歌首度亲自作曲

谈到最近推出新歌《无床共枕》，除了由Lala亲自作曲，内容更是她提供给填词人锺晴而写，「我唔止一次Long D，台湾嗰个系去旅行识，第二个佢喺大陆做嘢，但系佢系香港人嚟嘅，首歌想写番有少少回忆嘅嘢落去，加上𠵱家疫情关系，我身边嘅朋友Long D本嚟好少见，𠵱家更加见唔到，佢哋好惨，所以写首歌安慰吓佢哋。」

Lala坦承两次Long D经验已令她怕怕，「内地做嘢嗰个拍咗一年，台湾嗰个都拍咗两、三年，真系怕怕，譬如：生日、情人节都未必喺度，所有重要日子未必喺度，或者我𠵱家开骚未必会嚟到睇，好多重要嘅时刻，好似都冇办法喺一齐完成，当然佢重要嘅事情我都未必喺度，互相都觉得搵番个当地人会好啲喎！有个moment令我最想分手，有次我碌咗落楼梯整亲，入咗医院缝针，因为我本身自己住，觉得好惨男朋友都唔喺度，嗰时佢仲要做紧嘢，打电话又唔听，几个钟先覆番我，已经觉得唔系好需要咁样啦！」