星岛独家｜江嘉敏自认「辣椒仔」 学懂带眼识人

TVB新剧《七公主》正在热播 ，剧中江嘉敏演技大突破做双面人角色，饰演钢琴老师的她在家中是「纯纯兔」，实际却是骗子集团老千，为求进步江嘉敏自掏荷包找老师上堂学戏，入行四年的她成功演活角色令网民大赞！

撰文∣Cynthia 摄影∣邓国良

由黄翠如、林夏薇、高海宁、江嘉敏、陈滢、邝洁楹、刘佩玥、陈晓华等主演的TVB剧集《七公主》，讲述隐形富豪逝世后留下七个遗愿给七个同父异母的女儿，姊妹间接受不同任务期间，除了恩怨情仇剧情，又有戏剧元素，成功吸引不少观众追看。

剧中饰演四妹的江嘉敏，入行四年机会不断，监制陈维冠更大赞江嘉敏有天份兼够努力，不断给她机会在剧集发挥，江嘉敏亦非常感恩：「其实我和Joe监制很有缘分，因为我们第一套合作的剧集就是《跨世代》，当时他并不是一开始就找我，而是开了剧集一个月左右，碰巧有新角色才想到用我。那时候我还是新人，很多监制其实没有怎样留意我，拍完第一套剧集《亲亲我好妈》我就去咗拍综艺，所以根本冇乜监制认识我，但就是Joe监制够大胆，认为新演员可以一试，然后就一齐合作咗第一次！到后来《杀手》、《跨世代》到《七公主》，九月开新剧都会和他再合作，觉得好开心，是缘分！」

自认似「炸弹」

江嘉敏在剧中做双面人，表面是斯文钢琴老师和乖乖女，实际却是骗子，与丁子朗有感情线，问到角色是否跟现实中的自己一样，她直言自己是「辣椒仔」，「我唔会形容自己真人系神经质，可能系辣椒仔！或者系一个炸弹，但唔系神经质。我之前真系饰演过分裂的角色，即是心理上有点问题，但今次《七公主》这个角色我不会形容她是分裂，而是一个完整的人。因为大家姐是黄翠如，二家姐就是高海宁，我在她们面前就是和事佬，在她们面前就系纯兔，好乖好听话，咁另一方面我系一个钢琴老师，表面系一个好贤淑嘅老师，但背后我有一个诈骗集团，兼且我是一个final boss！初时都曾经和监制质疑角色会唔会很跳？但他和我分析举例，指我在他面前、导演面前、以及妈咪面前嘅态度同埋处事都会不同，所以其实不是分裂，角色系一个好完整的人，人就是这样，好像我在珍姐（曾励珍）面前的态度亦会截然不同，哈哈！」

入行四年，江嘉敏为求进步，更加自己俾钱上堂学戏，自我增值，「我是自己俾钱学演戏，我都希望公司可以开班俾我，等我可以一路做嘢一路学！其实我拍第一套剧的时候已经上acting class，因为我拍长剧之前都系拍广告，电影或者微电影，大家都知TVB的schedule系比较密，之前就未有时间再上堂，之前我知高海宁同埋Ali（李佳芯）都有去上堂，所以熟咗就叫佢哋介绍老师给我！其实我已经上过几个老师的演艺班，拍《七公主》之前有上过堂，拍完这套剧亦有上堂，上堂后发现自己其实有很多拍剧期间不会为意的问题，好有帮助。」

曾与屋企人「顶到行」

入行前是钢琴老师的江嘉敏，今次在《七公主》做返老本行，有机会展现琴技，令母亲老怀安慰，江嘉敏说：「如果我冇入行，可能我都仲系教紧钢琴！我儿时希望做演奏家。我觉得今次监制叫我做钢琴老师是专登，因为拍之前佢有问过我入行前做乜，我有同佢讲我做过钢琴老师，跟住佢就安排咗我喺剧入边做钢琴老师，最开心应该系我妈咪，佢细个投资了很多资金给我学琴，教教下琴我就去咗做演员，本身佢都有点揼心口，𠵱家有机会可以show off下琴技，佢都几开心，老怀安慰！」

现实生活中，江嘉敏直言在家中和对外的自己反差不大，「我觉得自己屋企同出边都冇乜太大反差，我都系比较热闹同埋锺意讲嘢嘅女仔，所以系朋友面前或者屋企都系担当一个系咁讲嘢、带欢乐给大家的人。细个同屋企人真系顶到行，同妈咪系火星撞地球，因为我哋性格都比较相似，所以我都几肯定我唔系执返嚟！然后我细妹又有样学样同屋企人又系顶到行，不过大个咗好好多，因为思想成熟咗，同埋我老了，冇咁多气力顶嘴！𠵱家妈咪应该觉得我乖咗！有时妈咪会话觉得我系一个好家姐，但唔系一个好女儿，因为我好锡细妹，细妹话想要乜、去边度我都会满足佢，但妈咪讲嘅嘢我就成日唔记得！哈哈」

看见女儿有成绩，江妈咪亦都由反对声音变做支持，「其实我好感动，因为妈咪比较严格，睇到佢由唔支持嘅态度，到𠵱家会send message俾我话我啲剧集几时出街，又会问点解今集剧集无我份，佢追我嘅剧多过我自己追自己嘅剧集，几感动！佢哋亦都会俾好多意见我！有时捱夜好残佢都会煲好多汤水！」

和男友无所不谈

是非不断的江嘉敏，如今明白到要带眼识人，但亦会坚持做自己。「其实我不嬲都系做自己，我觉得点解大家会误会我，系因为我真系太多嘢讲，太嘈喇！𠵱家可能会比以前静啲，因为真系冇咁好气，好攰！以前会唔识得分时候，乜都系咁讲、系咁倾，𠵱家就会识得睇时候，例如有啲好重要嘅场口，就会认真对待，当然我不嬲都好认真，但以前会花好多时间去倾偈！要带眼识人系真嘅！我又冇觉得成班女仔一齐就会多是非，好似《七公主》唔止七个女仔，好多人都问我今次拍剧会唔会成日好嘈，好多是非，勾心斗角？今次真系冇，唔一定系女仔聚埋一齐就有呢啲嘢！」健谈的江嘉敏，更被封为TVB三大喇叭，她认为称号是正面的，「公认系三大喇叭，冇得唔认！大家都是希望热闹，想气氛好，当然我哋都识得睇时候去搞气氛，我觉得呢个称号是正面的！」

江嘉敏与电竞公司高层男友Anthony拍拖三年一直恩爱，她认为二人相处舒服，亦都无所不谈，谈到拍剧有事需要亲热戏，她就表示男朋友唔介意，更会一起研究，「我哋会一齐睇，牀戏暂时未拍过，锡戏就有试过，我哋都会研究点样锡会好睇，我都有问过佢会唔会介意，佢话唔会，明白这是我的工作需要。佢仲同我讲以前系童星，不过我唔信！」搞鬼的江嘉敏，亦都隔空向男友撒娇：「起初拍拖他会经常接送我，等我现在乘机投诉先！佢都属于细心，之前都会煲下汤，因为𠵱家工作忙就少咗，但如果我凌晨收工揸唔到车，佢都会来接我，买支水给我，不过煲汤呢排就真系少啲！或者我都应该抽时间煲返汤给佢饮。」

和昔日好姊妹冯盈盈因为一次船P传出不和，问她会否对水上活动有阴影？江嘉敏笑言：「这阵子我经常拍水上活动节目，已经黑了很多，够了！我觉得自己就嚟变非洲人！」

原文刊于《星岛日报》名人杂志（逢周日见报）