独家丨露云娜终于开Show戒甜着靓衫疫情冇工开声带都发霉

2021-09-29 23:15

今年7月，露云娜为《风行的音乐永续》唱片翻唱陈百强嘅经典歌《我的故事》，反应及销量同样叫好，网民好期待举行实体演唱会，因此，风行唱片董事锺慧慧(Mimi)马上做嘢，喺10月12日举行《音乐永续演唱会》。疫情下停晒工，形容连声带都发霉嘅Rowena欢喜若狂，嗱嗱声减肥备战。采访：方骞平摄影：沈健程场地：九龙海逸君绰酒店Waterfront Bar&Terrace

喺疫情下露云娜(Rowena)冇乜搞作，去年底再推出Hi-Fi发烧专辑《下雨天》，上吓电视及电台节目，做吓些少宣传就系咁简单，所以一听到下月喺文化中心，跟方伊琪、欧信希、张武孝(大AL)开演唱会就相当期待，她兴奋说：「我真系好痕(身痕)，听到音乐会郁手郁脚好想跳舞，疫情期间都冇开过live，好怕把声都发晒霉，平日只系对住老公唱歌，真系几闷㗎，好想同班fans近距离接触！」

续约包食一世白饭
目前Rowena戒食甜嘢及淀粉质，希望身形瘦啲，到时着起战衣都会好睇啲：「演唱会上会唱《我的故事》、《传说》、《千年女王》、《戚眼眉》等经典歌。」问到系咪唔太计较歌酬？Rowena大笑说：「老板好锡我！」Mimi即补充：「因为佢哋太乖，我唔忍心压佢哋价，都几高(歌酬)㗎！而且演唱会反应好，又多赞助，所以围到条数。」原来Rowena系「风行福将」，Hi-Fi发烧专辑《下雨天》喺疫情下推出反应好到出埋日本版。Mimi更报喜：「我哋真系好夹，最近佢同我哋续咗合约，我供应佢一世食白饭！」戒紧淀粉质嘅Rowena唔肯收货，笑言要Mimi包佢一世食牛扒。