独家丨车婉婉同鲍起静有化学作用 《我家》首拍影后演母女

谦称自己是拍剧新丁的车婉婉，最近在TVB剧集《我家无难事》首度跟影后鲍起静合作，饰演母女，婉婉坦言睇完剧本加上有机会跟鲍姐合作已劲开心，真正合作时亦感受到影后的「威力」。剧中婉婉儿子是高头大马的胡㻗，虽然现实中囝囝Justus（昵称BBQ）只得4岁，但勇气可嘉，令她相当欣赏。撰文：杜淑霞 摄影：叶君海 发型：Kate@HairCulture 化妆：亚晴 服装：Vein 场地：富荟炮台山酒店

婉婉在《我家》的拍档大部份都未合作过，她笑言：「我根本系个新人嚟，拍电视剧其实好少，只系因为《皆大欢喜》覆盖太过强劲。」所以对于今次角色戏份和挑战性都大感兴奋，「监制（王心慰）搵我倾『Double』角色时，我已经流晒眼泪，好锺意呢个角色，当吓除咗鲍姐外其他角色都未定案，我一听到鲍姐做我阿妈，又听晒个故仔，已经好恨拍。」


赞BBQ勇气可嘉

首次跟鲍姐合作，婉婉未开工已想好向对方请教，埋到位更加令她难忘，「我同鲍姐嘅场口唔算好多，但啲场口好激烈，好多嗌交戏，顶撞佢，啲女都系顶心杉，但系鲍姐一嚟好有妈妈感觉，我哋好易入到位，件事好容易就OK啦！我唔识点样讲，就好似啲积木跌晒落啱嘅位咁样，化学作用系点，留待观众睇完之后话番畀我听，但拍嘅时候，我同鲍姐都觉得件事系对劲，佢个火有几大我个火就有几大。」

17年婉婉为丈夫Jonathon诞下囝囝BBQ后已开始做人母角色，但想不到这剧会有胡㻗这样神高神大儿子。不过真实中的囝囝仲好细粒，但BBQ的勇气却令身为妈咪的婉婉相当感动，「最近带佢去学滑板，佢系唔炒埋墙都唔停，勇气几可嘉，唔系个个细路仔炒埋去10次都仲去玩，跟住佢有一次跌到个pat pat好痛，佢喊到不得了，但佢喊完自己同个教练讲，我想再试吓喎，好Man，好型仔，好勇呀！男仔能够有呢种勇气，跌低再试，我系好欣赏佢，再试佢就成功佢好开心，我有解释番畀佢听，唔放弃再练就会成功。」