森美收自己应援物劲开心 宣布Fans名称叫「美人」

因为之前拎吕爵安灯牌去睇MIRROR演唱会，加上又好支持MIRROR，所以森美经常收到镜粉送赠的MIRROR应援物，贴纸海报手幅呢啲好基本，之前Edan出第三首单曲《My Apple Pie》，森美就收到苹果批应援物，当时仲赞「爵屎」好醒目添。

本周五就48岁生日嘅森美今日都收到自己嘅应援物，「我快生日，我粉丝好有创意跟潮流，帮我整应援物，有我嘅卡同埋森美爱情尺，商业电台啲同事收到个个问我搞乜鬼，Hahaha. 好玩！」

而姜涛有「姜糖」、Edan有「爵屎」、Anson Lo有「神徒」，森美嘅Fans都有名嘞，「我正式向大家宣布我D粉丝叫做『美人』，多谢我班『美人』送畀我嘅礼物！！」森美仲话成日收到MIRROR应援物，所以就叫自己班「美人」送返应援物畀佢哋当系回礼喎。