独家丨龚柯允正视有技巧冇感情 新歌讲出唱Live心声

龚柯允（Karen）最近推出亲自作曲新歌《Sing A Live》，首次尝试摇滚曲风，唱出对现场演绎及音乐态度的心声。Karen 直言早知自己唱歌有技巧冇感情的问题，但一直逃避亦搵不到方法解释，到去年参加《全民造星III》逼使她要正视，尝试攞出真感情面对观众，希望演绎歌曲能感动人亦能感动到自己。采访：杜淑霞 摄影：叶君海 发型：Adam Hui@Duet Cuts 服装：mi - tu 场地：Duet Cuts & Cups

Karen 希望攞出真感情面对观众，演绎歌曲能感动更多人。

《Sing A Live》大玩摇滚风，是Karen的新尝试。

《Sing A Live》早在Karen来港初期，住在60尺劏房时写，当时是人生最低潮，所以歌曲带点愤怒味道，监制Eward Chan即给予她初尝摇滚曲风，「佢觉歌曲除咗脆弱仲有愤怒，佢叫我将啲燥底攞出嚟，录音时我将啲不愤、好愤世嘅嘢攞出嚟，不过我呢一面以往唔敢攞出嚟畀大家睇，怕大家讨厌。」

Karen坦言现在更期望大家赞她唱歌有感情。

早前Karen参加TVB《演斗厅》，开心成为「MVP」。

爆式唱腔有段故

Karen新歌有两个意思，除了想讲唱Live态度外， 而「Alive」拼埋就是活着。她自言音乐路并不平坦，在马来西亚出道时只懂跟安排去唱，变成只识唱甜美风歌曲，到现场爆咪演绎获赞，她就不断大声唱及飊高音，后来才知这种方式大家未必接受，「除咗《造星III》，之前好多人都讲过我唱歌冇感情，或者好多技巧，成日飊高音，《造星》后都搵紧方法但好难，唔系今次做到下一次都得，唱live时好多包袱放唔低，首先要承认自己唔够好先，面对呢啲评语时都会受伤，当然唔系觉得人哋讲得唔啱，或者特登伤害我，反而系讲得好啱先至好受伤，要打碎保护自己呢块墙，就系呢首歌讲嘅嘢。」

Karen参加《造星III》令她正视唱歌有技巧冇感情问题。

买了耳机的Karen，现在唱Live不会只懂大声和飊高音。

Karen又解释以往养成爆式唱腔，除了因不敢攞真感情面对观众，还笑指因穷买不起耳机，「好多时因为现实环境，唔敢攞自己好脆弱嗰面去面对大家，我唱歌路线比较爆式，因为我嘅掌声都系呢啲嘢而得到，加上我以前表演嘅场合系冇耳机，台下又嘈吵，听到自己把声方法就系大声，同埋可以令大家静落嚟专心听我唱歌，呢个都系《Sing A Live》入面嘅歌词讲到，希望人哋尊重我台上表演，但而家我会细声番唱，因为我投资咗个耳机，哈哈！」

Karen继网上卖榴槤，最近再与丈夫跟朋友合资开咖啡店。