独家丨Edan冧尽前辈全靠唔擦鞋劲惊唱Rap变数白榄

2022-04-08 06:00

Edan（吕爵安）@MIRROR最近推出第4首单曲《Elevator》，首次挑战跳唱歌，仲要Rap埋，他劲惊变咗数白榄，好彩有兄弟安抚兼在MV撑场，更获前辈罗家英和阮小仪加持。Edan入行以来深得合作过前辈厚受，早前毛舜筠访问时更指明最想他做仔，对于能冧尽前辈，Edan认真话秘诀就是靠唔擦鞋做自己。

采访：杜杜

发型：Man Chan@CHIC Private I Salon

化妆：Giann Cheung@Annie G. Chan Makeup Centre

服装：Ports V、Giuseppe Zanotti

Edan谓新歌因疫情拍不到MV，由原定2月尾被迫延至愚人节出。

相对之前出歌，Edan推出《Elevator》份外惊青，「始终跳唱同埋Rap，唔系我好擅长范畴，但系新人年过咗，想试同挑战唔同嘅嘢，同埋我都好锺意跳唱。」Edan经常被指懒音劲，今次Rap竟然畀花姐赞，「好彩Rap频密程度唔系好高，花姐都有赞我『你啲咬字好似好咗』，广东话Rap系好难，加上我冇Rap经验，我好怕变咗数白榄咁。」

首次推出跳唱歌，仲要Rap，令Edan份外紧张。

Edan在MV中除大晒舞技，还换上多个造型。

全靠兄弟畀信心

信心不足的Edan好彩得兄弟撑，「有Anson Lo、花姐，咦！花姐变咗兄弟𠻹！哈哈！仲有Jer同Jeremy，佢哋都有畀好多意见我，或者当我好冇安全感、信心，判断唔到时，佢哋都会话OK，我都安心啲。」MV除了有Anson Lo和Jer客串，仲有前辈家英哥、小仪和《阖家辣》导演Coby ，Edan谓因想睇落更热闹，「如果有唔同面孔出现，大家都会睇得开心啲，MV导演想大家估唔到下一秒发生咩事，如果有佢哋出现大家会好惊喜。」

好兄弟Anson Lo和Jer在MV中扮演维修员。

Edan初出道跟家英哥合作《台湾文西Only You》后，变得熟络。

Edan新歌MV获前辈加持完全不意外，因早前他跟毛舜筠合作电影《过时过节》，亦令毛姐好欣赏，接受李婉华访问时，更谓合作过的MIRROR成员中，最想Edan成为儿子。对此Edan竟笑言：「我阿妈应该会好开心罗！我阿妈一定会觉得佢教得好，哈哈！一定揽晒啲功劳上身，但都要畀返啲credit我阿妈嘅，但系好开心，同毛姐合作系个好好嘅经历同机会，毛姐超级好，教我好多嘢，有啲场口系冇佢，得我同其他演员，佢都特登过嚟，我本身拍《过时过节》好大压力，好紧张好担心，因电影个题材，同我以往嗰啲戏太唔同，好担心做得唔好，但有佢喺度帮我，畀support我教我，令我安心好多，真系要好多谢毛姐。」

毛舜筠早前跟Edan合作电影《过时过节》，对他印象好好。

吴君如跟Edan合作贺岁片《阖家辣》，很欣赏他的喜感。

恨拍韩式偶像剧

其实除了毛姐、家英哥、小仪和Coby外，跟Edan合作过的前辈吴君如、黄德斌和袁富华等等统统对他有赞冇弹，到底他有何方法冧尽他们，「就系做返自己，你要够真，你要有礼貌，但系你唔可以去到奉承擦鞋，你太过份去咗嗰啲，大家就会觉得唔舒服，我喺佢哋面前好做返自己，就系好真诚去对待大家，佢哋就会feel到你好真心，愿意交个心出嚟同你倾，教你嘢。」

黄德斌跟Edan拍ViuTV剧《大叔的爱》，赞他有礼又聪明。

Edan笑指自己获前辈赞，最开心是妈咪。

最近忙拍ViuTV新剧《季前赛》的Edan，第3度拍运动主题剧，到底他最恨拍咩题材？他说：「好匪夷所思，明明本身唔系运动健将，但咁啱又咁好彩，全部运动题材都有我份，但系件好事嚟，工作同时帮紧身体嘅健康，训练埋身体机能，一举两得，今次《季前赛》篮球系我最锺意嘅运动，拍得特别开心，仲有咩运动剧想拍？拍埋足球罗！哈哈！」