孔德贤连剥四只智慧齿变青蛙脸肿到擘唔开口自觉似巴斯光年

2022-05-03 12:30

24岁TVB「小鲜肉」孔德贤（Danny）喺社交网上载咗辑肿到似「青蛙肿脸」相，见佢面颊激肿，真系超级恐怖，肿胀到个口都擘唔开。Danny图文并茂分享一次过剥咗4只智慧齿嘅惨痛故事，还标签「啲人话剥牙会瘦唔知真定假」、「一生人一次」。

块面肿成咁好恐怖。

明明系面尖尖嘛。

Danny话其实7年前读大学睇牙医时，牙医已经建议佢尽早剥咗啲智慧齿，如果唔系会点点点…讲到好夸张：「咁我呢个拖延症末期病人当然当牙医无到，幸福快乐咁生活落去。结果7年后，上排两只智慧齿因为太入擦唔到蛀晒，下面嗰两只打横生，仲要得一半出咗嚟，积住啲细菌搞到定期发炎，提醒我，(有)佢哋嘅存在。」

最后决定要睇牙医解决问题。

孔德贤大学时已被智慧牙困扰。

最后Danny把心一横，唔想再烦决定剥牙，佢忆述躺卧牙医牀跟医生对话，医生问：「想剥几多只？」佢反问：「可以剥几多只？」医生就话：「4只罗，唔洗烦，都系咁剥，好简单。」

无奈都系要去睇医生。

Danny好记得：「剥之前牙医拎住一只又大又粗嘅麻醉针，打咗6，7吓，其实唔系咁痛，然后慢慢成个口就冇晒感觉。只系听到好大声嘅电锯声同埋吸口水嘅声，仲有感觉到牙医好大好大力咁撬我啲牙，嗰种恐惧感，同做激光矫视差唔多，都系吓到标冷汗。好彩个医生出名手势好（收费贵），10分钟剥晒4只，完全唔痛。」不过，当佢做完个手术出返去，啲姑娘好似好担心咁系咁问佢：「『有冇头晕头痛想呕？』我心谂：咁大镬？唔好吓我呀。佢哋仲提我要不断吞口水，『虽然你feel唔到个口，但啲肌肉有感觉，如果唔系会流晒啲口水出嚟。』」另外，姑娘仲提佢要不断敷冰，如果唔系会肿到比卡超咁。他听到之后仲好兴奋，话好想睇吓自己会变成咩猫样。