古天后日志｜阿里以香港作第一上市有望纳入港股通

7月26日，天晴，长时间有阳光，酷热天气持续。美股隔晚个别发展，道指跟标指回升，但SNAP上周五急挫嘅阴影令科技股继续受压，纳指跌51点。嚟紧几日仲有唔少大型科企公布业绩，加上联储局议息，市场倾向观察。

市场预计今次联储局将加息0.75%，9月再加0.75%机会亦超过四成，不过市场已消化相关加息幅度。反而周四晚公布嘅GDP更值得关注，由于经济放缓，市场已将第二季GDP预测下调至0.3%增长，由于Q1 GDP已出现负值，若Q2意外地再出现负值，美国就陷入技术性衰退。即使Q2仍保持轻微增长，但上月唔少企业开始裁员，预期失业率于Q3会由历史低位3.6%回升，Q3 GDP唔会好得去边。

中港股市偏弱兼成交静

至于中港股市呢边，走势偏弱，成交淡静，「烂尾楼」事件困扰未完，不过阿爷话咗高度关注，当然要开始做嘢，有消息指阿爷计划筹建规模达3000亿元嘅「房地产基金」救亡，用以支持12家已出事房企继续起楼，唔停工就可以确保业主继续供楼。至于呢3000亿喺边度嚟，咁就梗系央行再加四大国有银行同埋其他内银齐齐筹旗。不过问题就嚟喇，内房企业唔少已连债息都还唔起，本金就一味有拖无欠，家下又搞多3000亿基金出嚟，呢条数日后唔知啲内房可以点还钱，睇嚟又系要内银硬食。

阿里巴巴(09988) 公布，董事会已授权集团管理层申请喺香港联交所主板主要上市。相关主要上市流程预期将于2022年年底前完成，其后阿里巴巴将成为以美国存托股份于纽交所，以及以普通股于香港联交所双重主要上市公司。阿里将港股改为第一上市地，有人话系为咗美国退市作准备，先唔讲阿里合唔合符美国上市审计规则先，阿里以香港以为第一上市地，最快出现嘅得益系可以符合互联互通资格，咁未来加入港股通，北水就可以买货喇。呢个消息短线对阿里股价当然系正面。

讲返港股，恒指失咗颈线20700之后，噚日再回试20500水平，刚好系3月及5月底部伸延上嚟嘅底部支持，最终呢个位叫守咗，只系近日成交持续缩水，即系港股由22000水平调整到现水平，都未见有资金肯入场捞平货。究竟系现水平唔够平，抑或系高位有货，资金已被套死，无论点都好，成交低迷反映咗市场系缺乏资金支持。

古天后

(徐狄怡，证监会持牌人)