独家丨黄秋生常被网民问候老窦︰一系叫你食屎啦重演舞台剧《ART呃》开到口呷子华醋

2022-08-03 02:00

黄秋生、陈淑仪和朱栢康继去年8月合演舞台剧《ART呃》后，今年10月重演，暂开8场。这段日子，秋生都在台湾拍摄饮食节目，未有再踏舞台，所以他用「复出」来形容，讲到香港观众好挂住佢，秋生突然醋意大发，扁嘴表示观众挂住近期演舞台剧《最后礼物》的黄子华多啲，仲举例证明佢唔系斋讲。提到偶然同网民有争论，秋生笑言，「你同佢讲乜都好，佢都系叫你食屎啦。」采访：杜杜摄影：沈健程　发型：Taky Chung@AdmiX Hair Styling（秋生）、Ray Mork@AdmiX Hair Styling（朱康及淑仪）　化妆：Jolinn NG（秋生）、Maggie Lee（朱康及淑仪）　服装：Rule Crossing Man（秋生）　场地：13A New Street Art Gallery（秋生）

朱康、秋生和陈淑仪戏内拗餐死，私底下有讲有笑好好倾。

朱康承认上年第一次面对秋生和陈淑仪演出，压力好大。

陈淑仪话虽然今次剧本跟去年一样，但彩排可能会擦出新火花。

去年《ART呃》一演十五场，相隔一年多重演，三位主角都受不确定因素影响心情，秋生话：「好似踩钢线咁，又唔知到时点样，见步行步啦！」朱康就认为，「今日唔知听日事，有得聚埋一齐，我好珍惜呢样嘢。」问到两次演出会否有不同？陈淑仪认为剧本虽然一样，但要睇彩排时大家会否撞出不同的新火花。秋生称朱康上次演出压力特别大，「佢个人比较慢热，搞十日都系天黑但一滴水都冇，唔知搞到几时，但跟住就滂沱大雨，佢系后劲强嘅马，前面包尾，后面一条大直路跑上嚟，变咗佢嘅压力就好大嘞！」朱康承认上次脑交战，今次有了经验会好得多。

舞台剧《ART呃》，将于10月28日假演艺学院演出。

朱康戏中有不少情绪爆发戏份。

同网民争拗「嘟」咗算

剧中讲三位老友为了一幅艺术品而争拗，彩排时也会争论如何演绎，秋生笑指连叫外卖都会拗一餐，问他是否跟网民拗得最多？他就继续搞笑话：「唔使争论㗎！唔啱听咪『嘟』咗佢（即删除），一只手搞掂，最多咪答一句，因为第一唔识佢；第二都唔知系咪AI嚟，有啲净系识讲两样嘢，一系叫你食屎，一系问候你老窦，你同佢讲乜都好，佢都系叫『你食屎啦！』，不停都系呢句，『嘟』咗佢咪算。」

去年8月，《ART呃》一连演出十五场。

去年演出尾场时，秋生已事先张扬会今年「复出」。

去年演出《ART呃》尾场时，秋生曾表示「明年复出」，他承认重演即是复出，「我成日都唔记得告别，所以我唔会告别，但系我不停咁复出，哈哈！」提到相隔年多才跟香港观众见面，会令观众好挂住，秋生听到即答得好葡萄：「系咪真㗎？我觉得佢哋挂住黄子华多过我喎！佢哋挂住黄子华多过我起码5倍，佢演四十场，我得八场！我如果加到十五场时，咪3.5倍咁罗！如果我开到四十场，佢哋锺意我同锺意佢系一样罗！」不过秋生认为开四十场冇可能，「有咁嘅观众量，都冇咁嘅场地啦！」

黄子华跟潘灿良合演的舞台剧《最后礼物》，共演出四十场。

秋生在台湾时曾为网台拍摄饮食节目《开著餐车交朋友》。

台湾出小说似被追债

秋生去年在台湾推出小说《黎根的天台》，他也估不到因疫情而衍生此机会，「我喺台湾识咗个出版社嘅社长，佢本文学杂志喺台湾好出名，佢又有搞出版，我返咗香港隔离，闷起嚟开始写故仔，摆咗上fb，突然收到台湾朋友电话话『社长叫你唔好再摆上去喎』，几惊佢话我文笔唔好，唔好再摆上去丢架！点知佢话『叫你留返个故仔畀佢哋登』，我一吓就答应人家，我系好锺意一吓就答应人，你问我结婚好唔好我都会话好，但系跟住就会后悔！哈哈！」秋生隔离期间仍未写完小说，社长不停追稿，似被追债一样，但完成后都有开心事，「台湾书展就出咗双封面，佢哋话『杂志社试过两个人出双封面，一个系你，一个系张爱玲』，讲完呢样嘢就开始惊，佢又再追稿。」

秋生隔离时在网上连载小说《黎根的天台》，获出版社邀请后便暂停。

秋生获台湾文学杂志邀请写小说，还成为双封面人物。

秋生曾在社交平台透露有意开演唱会，他就笑指有意开「轮回」演唱会，「我长期隔离，冇人同我讲嘢，发觉失声呀！把声又沙，讲嘢仲走音𠻹！自己同自己讲嘢都跣胎，咁好得人惊，一个演员冇咗把声就死啦！跟住要去打针嘛！打完针回春呀！我喺屋企弹结他把声可以去返个高音，唔知我打咗咩针，可能系女性贺尔蒙！哈哈！跟住搵朋友练歌，都几十岁不如搞返个演唱会啦！我呢个叫做复刻摇滚世界轮回！我笠住个地拖头唱呀！」