「亚视一姐」阿仪官非累死姚琰欣狂申冤 黄榕匿埋两日终认衰道歉

本周一，38岁「亚视一姐」薛影仪（阿仪）再惹官非，涉嫌「驾驶时没有驾驶执照」、「驾驶未获发牌照车辆」、「没有第三者保险而使用车辆」及「驾驶电单车时没有戴上认可防护头盔」被捕，已获准港币5,000元保释候查，于10月上旬向警方报到。

阿仪、Bonnie及黄榕当日一齐出席活动。

当日《星岛头条》已独家披露阿仪为撑老友黄榕，未有知会亚视私下答应出席活动。事件曝光后，有指拍片者是同场的亚姐姚琰欣(Bonnie)，之后对方已急急在社交平台出Po澄清：「活动唔系我带佢去，段片唔系我拍，把声唔系我嚟，大家唔使再Send畀我！唔系我！」

Bonnie澄清完都冇用。

不过，就算点澄清都被网民闹无脑，Bonnie觉得好惨，主动联络《星岛头条》记者申冤，因为好多人以为段片由佢拍摄，又指黄榕唔出嚟同人交代清楚，「好多人不停send嚟问我搞到我好烦扰，睇到啲新闻觉得自己好冤枉比人屈，好唔开心，已经连续两晚都瞓唔到，嘢又食唔落。我男朋友见到我咁好担心好登（戥）我唔抵，自己女朋友比人屈，觉得比人推咗我出嚟自己面对咁，但明明就唔关我事。」

问到会否怕影响之后接Job，佢都好担心，「都担心，因为呢啲系好低级错误，都担心同亚视关系，因为始终呀仪系亚视艺人，我都系选亚姐认识呀仪，咁样比人屈以为我私下带呀仪出席活动唔同公司讲，其实都好严重，其实之前我都有啲广告商朋友想我介绍邀请呀仪工作，我都系比Connie（阿仪经理人林宝玉）嘅电话佢哋自己倾，唔会背住亚视帮呀仪接工作。」

对于始作俑者黄榕，Bonnie希望佢快啲出嚟交代清楚，「因为其实我澄清完，睇到啲网民留言都估到系边个。」

Bonnie以短讯表示，事件令佢情绪受困扰，瞓唔安食唔落。

话口未完，今日下午三时，熄电话两日嘅黄榕终于蒲头道歉，「本人黄榕Gloria 2022年8月13日出席的I wanna fly 2022电单车活动，本人是邀请阿仪以朋友身份来玩，她当天不是以嘉宾工作身份来出席活动，这次事件令阿仪，亚视公司以及其他任何在这活动事件上的艺人带来所有不便，我在此深感抱歉，事件已经交由律师处理当中，我不方便再回应。」
 

黄榕知道避唔到终于要上水。

TEXT:SW

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ