独家丨MC激罕崩坏Look自爆有女埋身即面红 绝密探班处男电影演烂挞挞科学家

乐坛新人王MC（张天赋），最近杀入埋电影圈，首部电影《夜校》拍住凌文龙（小龙）同葛民辉等前辈齐搞笑。MC在处男作饰演三流科学家，造型好突破，着人字拖加烂挞挞态度，仲要好麻甩咁戙戙高脚食面，Fans暂时将台上好有Power唱《小心地滑》嘅佢放埋一边先。豁出去的MC，仲攞自己5尺6寸（官方声称）高度嚟开玩笑，甚至唔介意将超巿绯闻摆上枱，仲大方表示一直等紧做超巿代言人，呢啲咪识玩罗。 采访：杜杜 摄影：娱乐组

MC同小龙戏里面系好兄弟，阿葛帮佢哋澄清咗冇其他暧昧关系。

戏中MC同小龙系三流科学家，设计埋啲搵唔到食嘅嘢。

《夜校》由黄永峯监制、刘翁执导，戏中MC和凌文龙饰演好兄弟，两人都醉心科学，但创作埋啲搵唔到食嘅设计，结果穷到要住喺小龙女友陈紫萱（Summer）屋企。探班当日剧情讲述，MC、小龙齐抬面色苍白，郁都唔郁嘅葛民辉返屋企，阿葛笑指：「全套戏入面我系一个好沉默嘅人，同我以前嘅角色系好大分别，系考演技，导演盛赞我今次可以提名最佳男主角，演技完全唔浮夸，好沉实，问鼎影帝都冇问题，基本上我系一个道具，哈哈！」

导演刘翁亲自讲解，三位演员都好留心听。

阿葛形容角色人唔似人鬼唔似鬼，全程都系呢个死样嚟演绎。

阿葛访问时似开栋笃笑，仲揸埋只假手指手划脚，笑死人。

凌文龙好少俾女飞

另一场戏，Summer觉得男友小龙黐埋MC不思长进，仲要两条废青住埋自己屋企，顶唔顺提出分手，两人嗌晒大交气氛好差，但在场嘅MC完全懒理，仲有心情坐喺沙发，戙高只脚食面，个衰格样同平日靓仔look真系有好大反差。讲到畀女飞，小龙声称冇乜经验，仲话：「其实我都好重视佢(戏中女友)，佢唔明白咋！我好锡佢㗎！我成日同佢讲我嘅工作有人赏识，我包养佢一世。」

小龙同Summer嗌交讲分手，但MC好少理照戙高脚大啖食面。

MC呢个食面样，虽然衰衰格格咁，但系又几过瘾几搞笑。

MC Keep住荧幕初吻

其实套戏唔止得小龙有女埋身，MC都有感情线，就是靓女黄曦谊（Candy），不过MC就强调两人冇亲密戏份，咁Lucy（李璨琛个女）就可以放心嘞，MC又话仲未献出荧幕初吻，希望将来拍戏有机会，问到系咪今次对象问题？，MC秒答，「绝对唔系啦！」MC仲自爆跟Candy黐埋啲都即变怕丑仔，「拍呢套戏前有个workshop，畀我哋去了解大家先，头几次我哋好尴尬。」 Candy踢爆他：「佢同我对戏就会笑！」MC再补充，「你记唔记得有条片拍到，我唔小心跣亲跌咗落地下，跟住你埋嚟问我，『你点呀？』，我系成块面红晒！」

小龙同Summer谈情，MC全程做电灯胆。

小龙同Summer虽然系初次合作，但两人演情侣好合拍。

拒绝同女仔去超市

虽然MC同饰演神婆的陈伊霖（Eelyn）戏中冇感情戏，但两人镜头内外都不停互窒，十足十斗气冤家，MC仲笑指女方于戏中好羡慕可以拍拖嘅角色，「佢系发姣嘅神婆嚟，所以简称『姣婆』，弊！佢应该开始诅咒我，今晚返去作法。」Eelyn即还击玩踢爆，「我哋上次倾偈，讲开绯闻嘅好处，我就同佢讲不如我哋得闲去超巿行吓，但系佢拒绝我罗！」MC即刻澄清，唔系厌弃Eelyn，「真系唔关你事，一路以嚟都好想争取到呢个代言，呢个机会，就留返我真系有代言嘅时候。」

MC玩埋自嘲，话呢个先系自己理想高度喎！仲点够佢玩先？！

MC出道以嚟都属有型靓仔，刚开骚继续做返个偶像。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ