独家丨张伟文被指坐轮椅唱歌「惨不忍睹」全城齐估声大大女歌手方俊有暗示

2022-09-09 09:00

69岁「靓声王」张伟文（Donald）即使中咗新冠肺炎，仍然卖命完成3场《友情有义演唱会》。不过，对于Donald坐住轮椅仍然开Show，反应两极，《星岛头条》日前就独家报道有位好有「份量」，又声大大嘅女歌星发表个人感想，「佢身体咁差仲要推佢出嚟赚钱，要佢坐住轮椅唱歌系惨不忍睹嘅事。」搞到呢位自强不息，残而不废嘅老人家非常嬲猪，咬牙切齿激动反驳：「我梗系嬲啦，我剩番碗饭，碗饭对我嚟讲好宝贵，得一、两份收入都唔放过我？我点样做系我嘅事，我锺意唱歌，锺意唱到老呀。」

唔好嬲啦。

张伟文喺特制豪华轮椅上，跟方俊及姚炜合唱。

张伟文每场演唱会都感动到喊。

肥妈和黑妹姐第一场嚟咗后台探班。

张伟文和经理人方俊关系比父子更好。

方俊及方丽盈好照顾张伟文。

有歌唱嘅张伟文回复精灵。

元朗演唱会上座无虚设。

留言区掀骂战
报道一出即成各大讨论区热烈探讨嘅话题，好多网民为张伟文打气，叫他加油，又大赞经理人方俊有情有义。都话网民讲嘢从来唔使负责任，有网民指张伟文「玻璃心」，又留言：「其实一个失去自主能力嘅人，已经唔系属于正常嘅人士，难听讲，到时出意外…」、「一个连自己都照顾唔到自己嘅人，仲要咁样献丑…」、「我觉得佢转牛角尖。」、「曲解人哋意思啫，人哋不是幸灾乐祸，只系觉得惨。」、「言者无心听者有意。」等等，马上被有同理心网民驳斥：「如果有一日你病到要坐轮椅返工，我同同事讲，真系惨不忍睹，你会点？」、「本人觉得惨不忍睹四个字，绝对是用词不当」、「我觉得佢唔要人同情，系要人支持。」、「冇口德人下场一定更惨。」、「搵食啫畀条生路行吓！」、「人哋坐轮椅要佢养？把口咁臭嘅？」甚至有网民话：「我反而觉得𠵱家企喺度唱歌嘅，大部份至系惨不忍睹！」

网民揪出「真凶」
另外，全城网民齐估谁是声大大女歌手，誓要揪出「真凶」，嫌疑人物包括肥妈、甄妮、杜丽莎、郑欣宜，甚至九唔搭八猜测喺新加坡定居嘅朱咪咪、冇关连嘅薛家燕、谢安琪、何韵诗及邓丽欣。留言区充斥问号：「系咪肥妈？」、「应该唔系肥妈，佢同黑妹都一齐去撑场，我估系朱咪咪！」、「欣宜更有份量啦！」、「欣宜唔会系呢啲人，应该系老一辈嗰啲！」、「杜丽莎甄妮最可疑。」食花生指数相当高。
《星岛头条》即搵经理人方俊问两句，眼见咁多有「份量」女歌手被拖累成嫌疑人物，他非常唔好意思：「如果事件影响到欣宜、家燕姐、甄妮、杜丽莎等感到非常抱歉…」记者发觉方俊冇提到肥妈个名，唔通讲漏咗！？

嫌疑一号肥妈。

嫌疑二号甄妮。

嫌疑三号杜丽莎。

嫌疑四号欣宜。

方俊又表示：「我相信每个人想法唔同，嗰个系女歌手主观嘅睇法，而伟文亦冇因为坐轮椅唱歌而觉得自卑，更唔需要用惨不忍睹嚟形容佢，佢积极面对人生，自食其力唱歌赚生活费，有咩问题？呢种不屈不挠嘅精神系值得敬佩。」他更强调张伟文唔系女歌星想像咁可怜，他反而热爱唱歌，有歌唱生活有寄托。提到张伟文目前身体状况，方俊指他虽然要靠轮椅出入，而且仲有脑退化，记忆力冇咁好，但唱歌技能已经入咗心：「呢样嘢难唔到佢，若有机会，我一定帮佢安排演出。」