古天后日志｜淡友会否乘胜追击结算后有较明确方向

10月28日，天晴，天气乾燥。美股隔晚个别发展，早段道指一度升逾500点，资金明显流向传统经济股，受科技股下跌影响，道指尾市升幅亦收窄至只有194点，而标指跟纳指续跌，分别跌23点及178点。早两日已提醒大家，标指跟纳指已升抵反弹阻力，而道指则呈超买，美股将变得反覆，果然呢两晚美股表现强差人意。

纳指系三大指数中，明显表现较弱，虽然美债息有所回落，但高息环境始终不利科技股，喺纳指PE跟PB估值仍未算平嘅时候，资金唯有抛售科技股，而多间重磅科技业绩公布后急跌，强如微软季绩仍录得增长，但喺嚟紧一两季增长可能放缓，股偎一样要跌7%。至于好似Facebook呢啲，业绩确系唔掂，股价就喺业绩公布后急插两成半。而亚马逊公布业绩后，股价亦曾急跌两成，虽然跌幅最后收窄至12.8%，但重磅股跌一成，都咪话唔大镬。不过美股跌到呢啲龙头股，唔排除跌势已接近尾声，只系等终极一插再见底。

至于人民币周三狂弹逾千点子后，噚日回落落返0.88%，中概股升势受阻，隔晚中概股喺美股表现当然唔多理想，而噚日A股跟港股噚日表现较为反覆。A股跟港股缺水人所共知，内地基金经理为咗刺激基金销售，竟然出到基金经理团购自家基金呢一招，希望能令市场重拾信心，真系只能讲句，内地真够创意，呢啲出人意表嘅举动，真系只有中国先会出现。不过奇怪系基金经理宁愿用手上资金去买入自家基金，而并非将资金投入股市，其实基金经理自己都唔多睇好后市。

至于港股表现反覆，但呢个星期每日成交都保持到喺1200亿之上，有别于之前日日成交几百亿阴乾式下跌嘅情况，至于系嚟到呢啲水平，终见有资金肯入场接下货。不过连续两日港股升抵高位后，买盘就缩沙，又或者见沽盘借机逃生，好明显系高位无人肯追货，宁愿等跌落嚟接货。今日系10月期指结算，淡友今个月已立于不败之地，淡友会否喺11月乘胜追击，抑或鸣金收兵，好友有机会反击，相信喺结算过后，但有较清晰方向。