头条戏场丨《过时·过节》唔好再神化屋企系避风塘

2022-11-25 09:00

新闻稿咁样写，《过时·过节》是一部关于家人关系的电影，故事由导演受自身家庭经历而启发，道尽家人之间的沟通和相处。简单嚟讲即系伦理电影，亦即系导演曾庆宏经历过一啲唔太好的家庭问题，隔咗一排未完全解决，所以拍一套戏去释放自己。有人觉得好睇，因为从戏中见到自己，情况好似睇星座分析性格咁，明明自己一早知，但见到有人分析自己又觉得好准呀，好好睇呀；有人就觉得唔好睇，因为太真实，真系好烦。我觉得中上，因为谢君豪的个人表演真系好出色。(刚上映)撰文:廖思慧

全片只要见到毛姐同谢君豪同场，就知后者又要被闹。

谈善言同谢君豪系父女，无乜两句，靠眼神交流。

电影属于「家家有本难念的经」宇宙终极升级加强版，讲述一场「混乱冬至饭局」发生后的家庭悲剧。从来都话有咩父母就有咩仔女，睇冯素波饰演的婆婆对仔女的恐怖情绪勒索，就明白戏中的毛舜筠点解咁乞人憎，吕爵安脾气点解咁火爆。

毛舜筠个角色真系好乞人憎
好多人愿意包容唔太熟嘅人，但却对最亲密嘅人不留馀地，有咁Mean得咁Mean。谢君豪演得最好，饰演沉默又慢几拍的老窦是绝种好男人，识搵一定搵呢种，见佢被老婆即毛舜筠长期精神虐待及言语暴力都忍到，仲可以讲道理，但个女人即毛舜筠唔识珍惜，最后抵佢死的。对于感情，性格唔夹，讲极唔明，问题不断重复又重复都解决唔到，一律主张分手，真系唔好拖。

Edan戏中同老窦谢君豪好唔妥。

毛姐角色玩精神虐待可以拎100分。

毛姐角色会做钟点，因为喺自己屋企得唔到爱，而转去人哋屋企感受咩叫家庭温暖。

冇强行硬Sell温馨大团圆几好
由细到大睇戏都经常听到类似对白，「出面遇到咩唔开心、工作有几咁唔如意、俾老公老婆虾、男女朋友对你唔好」等等，唔紧要，屋企永远都系你嘅避风塘，一直想反驳好耐，唔一定㗎，屋企人玩情绪勒索先最出色，睇完呢套戏终于有导演肯以正视听，多谢导演唔硬加矫情的正能量，点解一定要齐齐整整先叫好?

睇Edan歇斯底里就好鬼头痕
电影以MIRROR的吕爵安(Edan)及卢瀚霆(Anson Lo)作重点宣传，后者饰演同前者有生意关系的好朋友，表现称职，因为戏份唔多。至于Edan的演技就好熟识，好似睇紧《I SWIM》李马荣同老窦闹交，每次见亲佢好激动都会好出戏，睇嚟Edan练咬字之馀都要好好上演技堂。