世界杯2022｜专栏：葡乌「大」战火力全开

葡萄牙上届世界杯曾经喺十六强对乌拉圭，最后以一比二仅负出局。睇番今届各自第一场比赛嘅表现，艾尔觉得两队都唔算太好。

葡萄牙上场三比二仅胜加纳，后防问题值得关注。艾尔觉得今场唔可以再用丹尼路彭利拿打中坚，因为呢位球员嘅防守意识唔系特别好，体能亦顶唔足全场。虽然比比嘅年纪比较大，但经验一定比丹尼路彭利拿多，拍住表现唔错嘅鲁宾戴亚斯，起码会令人安心些少，另外门将亦要换一换人。前綫方面，C朗拿度入咗球十二码，成为第一位喺五届世界杯决赛周都有波入嘅球员，但嗰球十二码都几有争议，况且C朗全场表现一般，亦好难寄望佢去番最高水平，艾尔会将焦点放喺翼锋拉菲尔利亚奥身上。

上场闷和南韩嘅乌拉圭，苏亚雷斯把握力一般，达云纽尼斯嘅表现亦唔好得几多，后备落场嘅卡云尼无乜发挥机会。球队比赛后段又试图不断传中，但本身无乜高大球员在阵，对住防守比较好嘅「太极虎」，都好难攞到入波。今场前綫阵容变动应该唔会好大，特别留意费达历高华维迪，呢位球员效力皇马嗰阵，除了可以打中场，亦可以打翼锋，如果今场将佢摆喺翼位，可加强边路进攻，对葡萄牙会带嚟一定威胁。

两队经过第一场嘅热身后，状态相信会再好啲。葡萄牙火力相对乌拉圭强，睇下防綫会唔会换下人啦！乌拉圭有老将高甸镇守后防，问题唔大，系睇下前綫今场可唔可以醒神番啲。艾尔估计下半场两队体能下降，应该会有唔少入波，先考虑全场入球大细「2.5」大，再谂乌拉圭让球受让「＋0.5/1」下盘。艾尔

立即下载 | 全新《星岛头条》APP : https://bit.ly/3yLrgYZ