古天后日志｜港股10日线上落 假前静局宜忍手

12月23日，天晴，天气非常乾燥，早晚相当清凉。本周除咗日本央行宣布容许利率波幅扩阔至0.5%，变相调节货币政策，由极度寛松稍稍收紧之外，欧洲息口亦调高至3.5%，德国10年债息再创高位，加息阴影再度困扰美股，隔晚美股显著下跌，道指更一度跌800点，尾市跌幅收窄至349点；标指跟纳指则跌55点及213点。标指受制3900之前嘅移动区间底部，暂时3800点见支持，睇嚟都要睇美息点走。

市场再受加息阴影困扰，主要系美国目前经济情况保持强劲，美国第三季GDP增长达3.2%，高过之前已修正嘅2.9%，消费支出增长达2.3%，远高于初值1.7%，虽然加咗咁多次息，消费维持强劲，美国人大花筒性格不变，裁员潮下未见悭啲使，暂时美国经济未见衰退。至于就业市场亦保持稳健，虽然科技企业大手裁员，但零售及餐饮业，尤其餐饮业持续人手不足，刚公布初领失业救济金人数为21.6万人，远低于预期水平27万人，就业市场强劲，GDP好过预期，即系联储局仍有空间加息。呢个就系近日美股疲弱嘅主要原因。

至于港股就无乜好讲，呢两日弹返啲，保返住条10日线，其实早于上月大市展开反弹，本来反弹目标就系19500至20000点，结果本月顺利达标，简单嚟讲，港股由10月低位反弹至19500至20000点水平，本月年结可以企到19000水平年结，都算收复部份失地，未至于喺低位年结，已经算唔错。由于短线反弹幅度已超过两成，港股后市再上，都要有更好消息，及更多资金入场配合。暂时市场炒嚟炒去都系中港通关，呢个所谓好消息都消戋得七七八八，至于入场资金喺长假期前则买少见少，喺呢段时间估计都系10日线上落，唔会有乜睇头。而大家期待嘅年结window dressing，都提前做定咗，今年净低几个交易日，断估唔会有太大变动，日升日跌窄幅上落，加上现水平值博率一般，不如忍忍手，呢几日开开心心过圣诞，唔好手多多。