古天后日志｜港股随美股反弹 缺水无成交下仍易跌难升

4月28日，大致多云，短暂时间有阳光，午间气温较温暖。隔晚美股大反弹，继微软同Google公布业绩理想，股价回升后，隔晚轮到Facebook母公司META做火车头，业绩后股价急升14%，带动一众科网股做好。加上FRC反弹，令市场气氛好转，对银行危机忧虑减退。道指升524点；标指升79点，纳指更升近3%，升343点。标指暂守4100，呢个过往嘅阻力，变成短线支持，只要呢个位守到，标指仍有望向上挑战4300-4400水平。

科网股明显跑赢大市，之前古天后一直都话要买科网股，就拣美股嘅几只巨头，事实上呢批巨头除咗苹果仍未公布业绩，其他已公布业绩嘅微软，Google，亚马逊及META等，全部业绩后股价表现都唔错。暂时美国经济未有如预期般大幅下行，陷入衰退嘅机会较低，但全年经济增长唔会有太大本事，加上银行收紧借贷，未来两季仍要关注中小型企业会否捱唔住，出现倒闭潮。美股方面，古天后都系倾向买大唔买细，即系尽量避开中小企，宁愿拣大型科企，每当股价下调时收集。

至于港股呢边，成交仍然偏低，暂时仲系一潭死水，虽然内地股市喺月初时，曾以大成交配合反弹，不过月中打后，已无以为继，唔少股份更加系高位进行派发。港股一度随A股反弹，不过成交完全唔配合，唔少重磅股更不断被主要股东趁高减持，令港股喺月中开始下行，至噚日期指结算，恒指已重返二万大关之下。虽然隔晚美股强力反弹，或带动今日港股再升，但20000心理关口未必能企稳，而恒指虽然成功守住250日线，但上面嘅10、20及50日线仍遥不可及。

外资趁高套现系不争事现，无论腾讯(00700)、阿里(09988)、京东(09618)都先后被主要股东，甚至系自己老板减持，大户都系趁高搵位减磅套现，咁作为散户嘅我哋，又何必咁勇对著干，走去接主要股东沽出嚟嘅货。暂时港股仍然系有波幅，冇升幅，一日未能解决缺水问题，港股都系瓜多过菜。留意最后防线250日线，一旦反弹后再失守，大市下穿19400水平，即系1月低位，再向下寻底机会大。