古天后日志｜资金舍难取易 唔买中港股买欧美日股

5月19日，部份时间有阳光，天气炎热，初时局部地区有骤雨，能见度较低。美国债务问题料可周末内解决，利好市场气氛。加上NVDA发布新款GPU，股价升半成，而Netflix公布广告订阅服务细节升一成，带动科技股气氛更炽热，纳指持续走强。虽然美股中段一度向下，但尾市再度拉升，三大指数全部向上，道指升115点；标指升39点，逼近4200短线阻力；纳指则升188点，进一步向13000点出发。

欧洲股市呢两季表现强劲，英法股市已先后破顶，德国DAX指数距离2021年高位亦不足1%，同样系破顶在即，日本股市亦创下年高位，反映环球资金仍然充裕，而美股相对上述股市较为落后，美股顿成资金追落后对象。虽然美股近日几番想作出较大回吐，但喺FAAMG强势带动，加上科企持续发布利好消息，资金喺美股追货意欲甚高。

从欧美日股市嘅情况嚟睇，资金一直risk on，但相对虚币市场，资金就相当保守，BTC跌穿30000大关后再失守27000支持；黄金价格跌穿2000美元，美汇指数回升至103.5。与此同时，喺美债息高企之际，科技股愈战愈勇，令人开始怀疑资金究竟系投放避险资产，抑或继续放胆投放高风险资产，面对目前乱象，完全系唔可以用过往嘅常理嚟解释。

虽然美股强势，尤其科技股气氛炽热，但中概股却未见受惠，反而几只重磅中概股，趁出业绩又嚟割韭菜，先嚟全世界无人睇好嘅京东(09618)业绩平平，大额花费补贴，业绩都系无增长，股价反而炒上，升7%。接住百度(09888)又系咁，条友仔吹几句AI乜乜物物，股价绩后又拉升4%。只不过呢两股升完一下无以为继，呢两日阴啲阴啲，又接近回到业绩前股价。轮到腾讯(00700)跟阿里(09988)未出业绩先兴奋，绩前股价炒上，绩后股价走样，又唔知几多韭菜被割。连股神巴菲特都想尽沽比亚迪(01122)呢只爱股套现，全情投入日本股市，股神讲明系怕咗内地企业嘅政策风险。

内地民企发展再好，好似腾讯已去到国际一级大企业级别，都被阿爷强行逼住出售手上投资项目，人家一心做大做强，阿爷就怕你强过头，强打出头鸟，咁嘅营商环境之下，叫资金点会放心长线投资。港股无新资金入场都唔系近期嘅事，即使留喺场内嘅少数资金，亦只系打游击方式搵水，咁嘅情况下，港股不赌是赢钱，夹硬入场只会换嚟损手烂脚，何必舍易取难，有美股唔买要买港股咁笨实。