古天后日志｜港股反弹持续 惟已逼近重磅阻力位

6月16日，多云，间中有骤雨，雨势有时颇大及有狂风雷暴，天气较唔稳定。美国维持息率不变，虽然点阵图显示今年内或再加息两次，每次0.25%，预期今年联邦利率将见5.6%，较原先预期5.1%高，而鲍佬继续放鹰，指今年内都唔会减息，虽然呢个较鹰言论，一度令前晚美股打咗个冷震，但喺FAAMG等圱磅科技股发力下，纳指跟标指回完再破顶，并升至高位收市，隔晚美股升势持续，三大指数再升逾1%。目前美股投资气氛高涨，资金持续流入，完全漠视所谓嘅坏消息，标指已升穿4400水平，暂时4300已成为支持，留意标指失守4300就有机会转势，但有智慧不如跟势，暂时未系做淡嘅时候。

美国暂时唔加息，但澳洲及加拿大加息0.25%后，欧央行一如预期加息0.25%，并扬言7月仍有加息可能，市场已接受加息，主要系核心通胀仍然高企，6月过后CPI喺高基数效应消失下，难以再大幅回落，今年之内唔减息亦合情合理，市场似乎已接受现实。美股近日能够节节上升，好大原因系欧洲股市喺较早前创新高后，资金流入美股及日股追落后，造就美日两地股市强势。而美汇指数从100回升至105水平，不利新兴市场，人民币上月起不断低走，令上月中港两地股市下跌。

不过追落后嘅概念，喺6月份于港股发挥作用，港股由18000水平返弹至接近20000水平，主要系美国国务卿将会访华，而阿爷亦出手减息，更有消息指内地将再推出刺激经济政策，阿爷喺本周末再出招。喺一连串好消息同时，港股已升抵19800水平，成交额亦增至1214亿元，不过北水却于噚日录得净流出资金74亿元。北水心急出货，未有等待周末好消息，急急脚沽货套现。留意ATMJB等重磅科网股，已逼近阻力位，喺资金面唔算强嘅情况下，要突破阻力有啲难度。既然北水都开始沽货撤退，若然今日再见北水净流出，更能证明北水买入只系短线操作，散户已被多次割韭菜，本论升浪已唔再相信港股，港股即使已由上月低位反弹逾一成，都只系大户对决，好友挟淡，但挟大可以去到几尽，古天后都系睇成交做人，一个缺乏成交支持嘅反弹浪，由万八弹到二万，已可能系强弩之末。