古天后日志｜港股沦赌大细赌场 北水弹出弹入 散户被割韭菜

港股｜7月26日，大致天晴，但间中有一两阵骤雨，日间天气酷热，稍后局部地区有狂风雷暴。喺美国联储局议息前，消费者信心指数升至两年高位，令市场对美国经济软著陆信心加强，美股议息前靠稳，三大指数仍录得升幅，而纳指调整权重股比重，呢两日亦未见对美股带嚟影响。

美国目前业绩期，但早于唔少企业公布业绩前，已见资金偷步买货，令唔少企业公布业绩后股价均见下跌，Tesla嘅走势就相当明显。而刚刚公布业绩嘅通用汽车，营收及盈利均优于预期，并调升全年预测，但股价低开5%，幸而低位买盘吸纳，收市跌幅收窄至3.5%。睇返同系嘅通用电气股价表现却气势如虹，资金轮动情况都几明显。

美股难搞 

目前美股去到呢啲位都几难搞，高居不下无乜可以上车，加上估值又唔系特别平，以重磅科技股嚟睇，一般PE都超过30倍，债息就有4%，而买股票暂时回率只有3%左右，股票投资嘅吸引力相对下降。虽然美国经济未有陷入衰退，但能够录得盈利增长嘅公司，只系单位数增长，更有公司盈利仍然倒退，呢啲位先嚟追货，值博率已唔高。

至于中港股市喺阿爷嘅政治局会议出重招救经济下齐齐反弹，A股3大指数分别升超过2%，两市成交回升至9481亿元，乐观啲睇系有好消息吸引部份资金入市，但就唔算多，9,500亿成交金额，仍远低于6月底热炒「中特估」嘅成交金额，股价当然系仲低过当时。睇返啲中概股表现，噚日唔少都系高开低走收阴烛，好消息争住出货，阿爷出招只系再次打开逃生门，无货嘅当然多肯入场高追。

港股呢边劲升4%，成交额增至近1,500亿元，似乎系有啲睇头，只可能周一大市喺无原因及外围未见急跌下，无啦啦插水407点，但当日就有近百亿元北水净流入，噚日大市劲升逾700点，北水就录得净流出超过60亿元。

其实呢个情况已经唔系第一次发生，北水弹出弹入，呢头买完嗰头走人，港股沦为日升日跌，赌大细嘅赌场。升升跌跌由大户控制，散户就一次又一次被割韭菜，试问韭菜割到连根都无埋，即使成功捕捉低位买货，但坐货过程极为痛苦，以阿里（9988）为例，畀你喺80元水平成功买货，经过两个月时间都只系录得不足15%回报，仲要上上落落多次震仓，坐唔定又震走，咁嘅市况叫人点可以安安乐乐同你坐定定。

相关文章︰

议息前瞻｜美国加息无悬念 港银本周势加P 看清供楼又贵几多

中央政治局会议无提「房住不炒」 花旗：为房地产打开大门 料GDP全年增5%

---

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ