专栏｜渐渐苏醒 狮子准备咆哮

车路士近期开始逐渐成型，而且更取得2连胜，究竟佢哋系点样调整？同大家睇吓领队普捷天奴点样可以将呢队车路士起死回生。

阵式上，普捷天奴绝对唔系用哥迪奥拿嗰套3421，而系用番佢最纯熟嘅4231。由一开始好保守，先由利维高维尔开始打左闸，跟住用芝维尔打左翼，及后知道球队入唔到波，战绩未有改善，肥普就作出改变，开始出番梅迪历加强左翼嘅推进能力，同时将安素费南迪斯同干拿加历查调位，效果显著，因为将加历查摆喺10号位，就可以推前条防线，加强拦截能力，而安素被安排褪后一格就令佢嘅长传能力得到释放，自然在组织上就可以靠佢嘅长传令更加多波放到入进攻三区。

然而车路士始终欠缺埋门能力，英超总共19次创造机会，只少过第一嘅纽卡素4次，可惜场均入球转化率1.4仅排联赛第9，直接令车仔成绩有所影响，尤其前锋尼高拉斯积臣都系相对幼嫩。

虽然入球效率低下令到车仔位列联赛榜下半版，可幸防守方面真系几稳固，近期作出好大改善，联赛场均只系失0.9球，仅仅落后曼城同阿仙奴。

每场比赛都可以睇得出肥普绝对系由后场开始建立，希望以唔失波为先，有时候亦执着地要从后场搓好多板，不过车路士始终都系青春班，系要一啲时间慢慢去打磨。但3个中场分工定位都逐渐清晰，队波亦建立紧争取胜利嘅心态，加上伤兵逐渐回归，所以深信沉睡中嘅狮子最尾都会醒返。Willhappy

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ