星8卦丨「细粒」现真身靠恶横行收大信封叠埋心水跟大佬搵食

2023-11-03 11:30

人真的不能貌相，好似「细粒」生得一副可爱纯情样，好多人都俾佢个样呃晒，以为真系咁纯品，而「细粒」成日sell自己有几惨，屋企有几穷，老豆唔要成头家，阿妈出去做鸡，自己就出于污泥，所以一定要搵好多钱俾阿妈报答养育之恩。其实佢真系得表面好，返到屋企恃住搵到两个臭钱对阿妈呼呼喝喝，讲真佢阿妈边有做鸡，只系做洗碗女工，但「细粒」觉得无面，所以作个大啲嘅故仔，搏人哋记得。

因为自细做街童，带住细佬妹周街玩，又有几分姿色，「细粒」好快就做咗阿嫂，系自己嗰区有晒朵，横行霸道，由于恶惯，入到行之后头嗰两年都可以忍住扮乖女，但唔使好耐就现真身，遇到唔高兴就去同幕后嘈，话要加戏又话要换拍档，总之郁啲就好有意见，搞到台前幕后都神憎鬼厌。最近又因为帮个朋友出头搞到一身蚁，明明系朋友错先，又学人扮大家姐同啲官斗，你估真系恶就得咩，吓到嗰位小职员喊晒，你目无王法就要受到裁。

不过「细粒」唔识惊，人前人后仲攞件事嚟讲，包装自己做正义女神，而实际情况梗系黑白癫倒，一班恶人讲歪理行邪道。自从现真身后，好多人都怕咗同「细粒」来往，公司亦决定中止合约，不过佢就大大声话自己大把计划，已经唔想做幕前，帮自己嗱番渣沙。不过佢咁多大佬照，唔愁钱就无嘢担心啦！