54岁李绮虹懒扮靓爱自然：唔使搞咁多嘢逾10年冇拍戏兴𡚒演黑帮大家姐丨独家

2024-05-07 07:00

54岁李绮虹最近由加拿大返港，同行还有加拿大籍老公Corey Solomonson及19岁全职运动员囝囝Sebastian。任职精神科护士的绮虹，去年拍新戏《Ruthless Bastards》，逾10年冇拍戏的她强调冇退出幕前，有啱角色仍会演戏。提到早前在社交平台Po素颜相成热话，绮虹觉得奇怪，又自言懒化妆和护肤，因再拍戏才扚起心肝扮靓。采访：杜杜摄影：谭志光发型:Ivan Lee@ IL COLPO 化妆:Kinki Wong地:The AIR (The ONE)

绮虹透露方铁伟导演已邀她再拍两套戏，未来仍有机会见到她演出。

绮虹跟老公Corey 和囝囝Sebastian感情要好。

绮虹在加拿大住在郊区，跟专心练习冬季两项（Biathlon，即结合越野滑雪和射击）的囝囝分开住，主动提出返港的囝囝，为了此行苦练广东话，他即场示范，「唔该，畀杯可乐我」但侍应只回他英文，令他相当失望。绮虹称囝囝自12岁后未有返港，因在当地间中见公公婆婆，所以讲广东话麻麻，但听亦OK。

绮虹跟囝囝一齐访问，Sebastian基本上听得明内容。

19岁的Sebastian自小热爱运动，几岁已开始玩Biathlon。

已达国家级水平的Sebastian，不时在Biathlon比赛中夺冠。

囝囝探班见武师断手吓亲

在当地做精神科护士的绮虹，去年底拍了加拿大动作电影《Ruthless Bastards》，她称因认识曾任特技演员，拍过《飞鹰计划》等电影的方铁伟（Bruce Fontaine）导演，「佢以前喺香港跟大哥（成龙）做武师，佢喺网上联络我。」由于她超过10年冇演戏，接拍后担心应付不到，要导演心理辅导，「我话唔知得唔得，会NG太多次，拖慢进度，佢反而惊我唔拍，话可以逐句逐句嚟。」

绮虹希望有发行肯将电影《Ruthless Bastards》安排在港上映。

戏中绮虹演经营地下赌场的黑道大家姐「周太」。

绮虹饰演经营地下赌场的黑道大家姐「周太」，有广东话对白，由于其他亚洲演员中文更差，全靠她指导，「我喺香港中文最差，去到变咗中文最叻，我帮人哋发音，系咪好搞笑呢？！」最可惜她未有机会大显身手，「今次个个有得威，我冇得有型。」囝囝知她是演员，亦有看过她的作品，「大打嗰场老公同囝囝嚟现场，我以为囝囝会好有兴趣，但佢话『No』，觉得好危险，因为睇住武师打筋斗上枱，再打烂张枱，个武师真系断咗只手。」问Sebastian有冇兴趣当演员，他说有机会都想尝试。

绮虹在戏中不用打，「呢个最失望！动作片唔畀我打。」

1994年，绮虹参加港姐夺得季军和最受传媒欢迎奖入行。

支持囝囝为追梦弃读大学

绮虹强调从未息影，「冇退出，系越嚟越少人邀请就冇拍！」她坦认已半退休状态，近5年做护士都是想做才做，演出亦不是为钱，如2013年客串好友杨采妮执导电影《圣诞玫瑰》，「你唔畀钱我都会做㗎，哈哈！帮朋友，好玩，有旅游，好似上次同ViuTV去日本。」当年因工作量少，她决定返加拿大定居，笑言搵工令她好伤心，「面包铺同油站都唔请，好失败。」最后她想到妈咪患精神病，就修读精神科护士课程，「冇大学证书都读得，话晒大学毕业，好似有少少退步。」她觉得护士很有意义，体力容许都会一直做，「做到70、80岁，真系enjoy！」

1994年，绮虹拍住黎明主演剧集《阿Sir早晨》。

2019年，绮虹为ViuTV拍摄《香港亲善小姐》。

绮虹又好支持囝囝为追梦，放弃读大学，转做全职运动员，「我会紧张啲人问佢点解唔读大学？最重要佢开心，做自己喜欢嘅嘢，有咩问题呢！？」对于当年误打误撞参选港姐，她称选完就过另一种生活，「好多谢香港观众同所有人。」她又重提当年投资失利，「喺香港见投资者，当时喺加拿大起紧屋，又蚀咗少少钱，好紧张，经理人话『你紧张系因为你有钱去投资、买楼，如果你冇咁多钱，唔会紧张，只会努力去打工』，呢啲系物质嘅烦恼，唔系冇饭食嘅烦恼。」

绮虹与Corey于2004年结婚，并诞下 Sebastian。

绮虹跟老公在加拿大过住半退休生活。

早前绮虹贴出素颜相被讨论，她称试着自然老去，「唔使搞咁多嘢，见香港之外，外国啲女仔20几岁已经整，我想睇吓完全冇伤口，20、30年后个样会点，同人哋比较吓。」她冇做幕前，不但少化妆，连护肤都懒，「我近年眼有问题，油脂分泌塞住，医生搵Facial仪器帮我通返，又送咗啲护肤品畀我，一搽啲皮肤光咗，有少少上瘾，同埋受拍戏刺激，畀啲钱整返靓自己。」