吴日言长期卧床好焦虑：香港乜都贵 40岁高龄陀第3胎暴增近50磅丨独家

2024-05-18 07:00

40岁，已有一子一女的吴日言（Yan）陀第3胎体重激增40多磅至160磅，虽然挺住超级巨肚但仍努力搵奶粉钱，亲力亲为打点牛肉面店生意，3宝港妈慨叹：「香港市道低迷，生活逼人，一家5口加埋工人姐姐，开支真系好大。」高龄陀B更令她有情绪问题，另外她又自爆已有plan B，唔排除今年带仔女去英国升学放眼世界，逼不得已留低老公Barry在港「跑数」。采访：方骞平

Yan冇避孕亦冇谂过40岁都中奖，一家人开心迎接新生命。

6岁大女竟指妈咪腹中BB唔衬她。

快将两岁细佬成日指住Yan个肚，期待话baby。

挺住巨肚拍广告。

吴日言系勤力KOL。

有过2次生产经验，快将临盆的吴日言懒懒闲，连BB房、BB衫及毛巾等都未执好，只执好备有孕妇卫生用品、腰封、水泡等的「走佬袋」：「经验之谈，因为顺产完伤口好痛，唔可以接触到张櫈，一定要有颈枕当水泡垫住坐10日。除此之外产妇肚皮真系好松㗎，要有返条腰，腰封紥肚都好紧要。」

Yan执好生仔「走佬袋」，预备随时入院。

顺产后伤口好痛，唔可以接触到张櫈必须要坐颈枕。

姊姊好锡细佬。

养家「跑数」交由老公负责。

温馨之家。

产前焦虑身形变化

虽然今次第3次拣顺产生B，但Yan依然紧张：「最难忘生大女时痛足10小时；生细仔时已好好多，只系痛4个钟，仲唔算系10级痛，但要出九牛二虎之力屙咗9次，好记得医生话，如果第10次都唔得就要开刀，嗰次真系好险呀！希望今次会再好啲。」高龄产妇的Yan坦言每生一胎会越走样，坦言𠵱家肥到似恐龙，加上年纪越大，肚皮再松多啲：「呢胎临产前明显负荷好大，双脚好肿，行两步经已好攰好辛苦，成日摊喺床休息。」衍生产前情绪问题：「大肚婆陀得辛苦系会有种焦虑，不论身体变化及外形改变都会影响情绪，加上之前有妊娠糖尿，生完BB后成为糖尿病患者，要严格控制饮食，会唔开心，好彩产前抑郁又唔算系咁严重。」Yan承认好怕产后变得又肥又丑，问到身形改变怕唔怕老公唔like？她即「要仔唔要佬」说：「佢唔like我唔紧要呀，至少有仔女like我嘛，咁喂人奶修身都快嘅。」

Yan陀第3胎体重激增40多磅至160磅。

Yan要老公体验大肚婆苦况，好搞笑。

摸住老婆个巨肚。

陀住两个大西瓜老公Barry试图弯身剪脚指甲。

可惜挑战失败。

Yan指每生一胎会越走样。

18年前Yan做歌手时，曾跟Krusty组合(左一及二)、傅颖做过《森美小仪歌剧团Big Nose》。 11

当年冬菇头发型是Yan的icon。

19年前的吴日言与张敬轩。

陪子女到英国求学

Yan透露第3胎是意外怀孕：「初时谂过生3胎，冇刻意计划，亦冇避孕，心谂『边会咁快有呀？』点知喺细仔一岁多啲就『中咗』。」Yan强调年纪唔细，3个够晒数，问到会否要求老公做结紥？她大笑说：「咁搞笑？唔使结扎咁惨啩。哈！」养小朋友唔容易，她慨叹香港乜都贵，开支真系好大，故两公婆另有计划：「大女今年6月派位，9月升小一，万一佢考唔到心仪小学，私校学费又咁贵，不如将学费预算用喺英国升学，到时我会过去『1打3』做全职妈妈，陪住佢哋成长，留低老公在港为养3条『化骨龙』嘅1200万继续『跑数』。」不过，Yan强调唔系移民：「我唔想用移民两个字去缚死自己，居留随缘，其实主要系陪小朋友去读书，为佢哋将来打算，自己都做晒呢个心理准备，虽然两公婆分开两地，但我觉得分开吓都唔系坏事，小别胜新婚嘛。」

去年9月开学日，两公婆带埋细仔送囡囡返学。

月前Yan到英国探访旅居英国的董敏莉。

Yan有心理准备往英国做全职妈妈。

同老公结伴去英国感受生活。

Yan2016年与老公Barry结婚。

小店经营难求支援

Yan和老公于尖沙咀重庆大厦商场内，合力搞台湾牛肉面及珍珠奶茶店一年，连装修亦两个人一手一脚做，对于近期食店出现结业潮，她庆幸小店仲撑得住：「好彩累积咗本地熟客，仲有游客先可以顶得住，而且口碑及业绩有增长，不过，因为用咗7位数私己钱，好希望两年内回到本，期望政府可以出手帮到我哋呢啲中小企，始终唔系大集团经营会有难度，好需要支援。」