专栏｜德国又小组赛出局？

欧国杯唔够一个星期开锣，德国仍然危危乎，我Will仔认为稍有不慎又会小组赛出局，其实对手瑞士、苏格兰及匈牙利都系难搞。

先睇黑鹰自身，德国两场友谊赛分别和咗乌克兰同绝杀希腊，唔可以话十分有说服力，两个位置又有发生失误，门将纽亚对希腊一个远射甩手，被人补射执鸡；对乌克兰有一球出迎传失，其实觉得佢一路嘅水准都有下降，近两个月接二连三都有失误，仲要系低级犯错，但正选位一定系佢，一定会令球迷担心。

另外一个位置就系庄拿芬达，达哥喺利华古逊踢三中坚当然无问题啦！最主要帮两边执漏同包位，但系德国𠵱家踢Back 4，每当俾人逼抢嘅时候都会好易甩，其实对希腊失嗰球正正就系佢交咗个「医院波」出嚟，所以佢畀人感觉都唔系好稳阵。

睇下对手瑞士，绝对系今届其中一队黑马，唔好睇佢用嚟用去都系沙基利，但其实佢哋中场都系几齐人，格列沙卡同富拿都系一对实而不华嘅中场，不论扫荡定系做反击嘅第一点都系咁醒神。匈牙利外围赛5胜3和未输过，佢哋稳守突击系有啲惊喜，而且系最早出大名单嘅球队，绝对要留意。苏格兰好多高空轰炸，绝对有机会恰到德国，随时趁佢哋瞌眼瞓整咗一粒，然之后摆喺后边守。

德国呢组望埋去好易出线，但其实都系有啲困难，随时又有可能小组赛出局。Willhappy

-----

《星岛申诉王》推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ