不再买楼收租 但心思思想买车位｜曾智华
2024-12-17 13:46 
做包租公从不是我杯茶，以前试过几年，以后咪搞，因为烦到抽筋。
简单来说，遇上个衰客，真系会人都癫。不但拖租唔畀，就算最后成功赶佢走，也会搞到间屋变灾场，垃圾堆满不止，若是破坏狂，更会将所有渠道搞到塞晒，简直变态。
就算质素好少少的，也可能不停搵你，呢时话冷气机唔冻，嗰时话窗台渗水，总之就当我系「七仔」，奉旨24小时应酬佢，点搞？
买领展好过买楼收租
老友，小弟假假地都属专业人士，每小时的「身价」，凡应酬你一次，咪等于冇咗半个月租？终于下定决心不再以收租作投资收入，只买入领展房产基金（823），做全港最多商场及停车场的间接包租公，但一切免烦。
你唔好问我，究竟买领展是否精明投资，当然未必系，但我买领展由10元开始，如今持有平均买入价为30元，计埋20年利息，早已回本。
怕收租是怕烦，但最近小弟又有点心思思，不是买单位收租，而是买车位。车位好处是冇客敢拖租，只要你唔交租，我落锁等你冇得泊即可；也不怕破坏王搞塞渠等小动作，可以乾手净脚。
路边车长期食「牛肉乾」
引起兴趣皆因家居附近越来越多住宅落成，全部一系冇，一系唔够车位。加上街上车位不足，故长期见路边车食「牛肉乾」。
两日前行过靠背垄道一间花店，门口贴了「豪华住宅车位出售」招纸，叫价115万元，咦好似有啲平喎，立即上网翻查市价。原来此大厦车位经常有人炒出炒入，近年由110几万到150几万都有交易过，今次登出的车位，可能是炒燶的银主货，于是走访相熟地产代理问吓背景。
地产代理话，「个客系炒家，最初开190万，搵鬼睇咩，减吓减吓咪减到115万罗，但系个车位在2、3楼，要搭电梯唔太方便；租就一定租得出嘅，三千蚊松啲啦，但记住要畀管理费㗎」。
制唔制得过呢？揸住个车位每年有约3厘收入，另外再博有机会升值，我谂应该都跌到差唔多挂？
返屋企问吓老婆大人点睇先？老婆大人斩钉截铁答：唔好买！
资深传媒人 曾智华
相关文章：
韩国经济实况 比大家想像中差更多 李声扬：若香港叫萧条 韩国不知叫甚么了
最新回应