滑翔傘友急降叢林宿一宵

一名愛好滑翔傘的6旬退休教師，前日傍晚到馬鞍山昂平玩滑翔傘，惟起飛不久因太大霧被逼降落叢林，安全降落後卻因沒有網絡未能致電求救，在「叫天不應、叫地不聞」情況下，不斷祈禱求保佑，挨着樹在叢林「宿一宵」，待昨晨他行山路尋找生機時，再次接通網絡，即報警求助，在救援人員帶領下終於脫困。
67歲事主鍾先生脫困後表示，今次遇險「分分鐘出唔到嚟」，他說前日下午約4時開始玩滑翔傘，「但因大霧，其實唔應該玩，自己曳，飛到出去睇唔到嘢，返唔到轉頭，見到下面有空草地，緊急降落，落咗去先知大鑊，原來緊急電話打唔到，冇網絡，惟有保持冷靜，不斷祈禱，感謝耶穌，求主保佑，夜晚晚，乜都做唔到，咪挨住棵樹瞓一晚，等第二朝（昨日）行出去搵路，行行吓，電話僅僅打到緊急電話，即打999，佢哋通知消防。最緊要係google map用GPS搵到我定位。」
翌晨行出山路接通網絡報警

事後仍猶有餘悸的鍾先生坦言「成件事都好感謝神」，他說「如果跌落樹林，係好難好難搵到你，我諗住分分鐘出唔到嚟，無論如何，我要感謝耶穌，我不停祈禱，求主保守，賜我智慧。」終於等到昨日早上7時，他逕自行出山路，接通網絡才可報警。

他指即使警方的HKSOS在某些位置亦收不到，「冇網絡就傳唔到位置，你會覺得好無助，我當時大安旨意安全降落，以為就可以打電話求救，但其實係叫天不應，叫地不聞，惟有求神賜智慧，讓自己休息一晚，第二朝天光求救都容易啲。我奉勸傘友絕對唔好飛入叢林，降落咗冇訊息，係求助無援。」

鍾退休前教英文，兩年前友人介紹他玩滑翔傘，已有兩年經驗，又形容自己係「老頑童」，前日大風大霧，很多傘友都跟他說「唔好飛」，結果令自己身陷險境，「今次好多歷練，當時挨住棵樹諗人生，係咪就咁玩完？」他行去搵出路時要攀山涉水，一踏泥地差點又跌下去，「感謝神我冇受傷，亦多謝消防員搵到我，有驚無險。」

事主稱曾使用警方的HKSOS手機應用程式嘗試求救，惟因沒有網絡而未能成功，警方昨晚表示，這是因為事主在活動前沒有啟動HKSOS的活動功能，故999報案中心不會在未經事主啟動功能下偵測到此宗意外或取得事主的地理位置，提醒市民在活動開始前記得啟動HKSOS的活動功能。